Սերժ Սարգսյանի վարչապետության դեմ բողոքի ցուցի մասնակիցները Նիկոլ Փաշինյանի ղեկավարությամբ շարժվեցին Խորենացի փողոցով: Փաշինյանը հորդորեց ցուցարարներին շրջափակել կառավարական այն շենքը, որտեղ տեղակայված են մի քանի գերատեսչություններ, այդ թվում նաեւ՝ արտաքին գործերի նախարարություն: Մի քանի ցուցարարներ ուղղակի փակեցին այդ շենքի մուտքը:
Փաշինյանը պարբերաբար կոչ է անում՝ որեւէ պետական գույք չփչացնել, չվնասել: Ապա Զաքյան փողոցում ցուցարարները որոշեցին նստարանների միջոցով բարիկադներ կառուցել: Նրանք շարժվեցին դեպի Խորենացի փողոց, մոտեցան պետական եկամուտների կոմիտեի շենքին, որի մուտքի դռները փակ են:
«Գործադուլ-գործադուլ, նստացույց» կոչերով ցուցարարները դեպի Մաշտոցի պողոտա են շարժվում: Կոչերին՝ փակել եւ շրջափակել պետական գերատեսչությունների դռները, քիչ ցուցարարներ են համաձայնում: Փաշինյանը կոչ արեց՝ մտնել պետական գերատեսչությունների շենքեր, եւ ներսում նստացույց անել:
Հիշեցնենք, որ այս պահին ազգային ժողովում վարչապետի ընտրությունն է ընթանում:
Ցուցարարներից ոմանք շրջափակել են ՀՀ գլխավոր դատախազության շենքը: Փաշինյանի կոչով ցուցարարները մեկ տասնյակից ավելի պետական շենքեր են շրջափակել:
Հիշեցենք, որ Փաշինյանն այսօր հայտարարել է՝ մեկնարկում է ժողովրդական ոչ բռնի, թավշյա հեղափոխությունը:
Նելլի ԲԱԲԱՅԱՆ
