«Իշխանությունը պարտավոր է դրսեւորել հանդուրժողականություն: Հարգում ենք քաղաքացիների՝ հավաքներ իրականացնելու իրավունքը: Դա սահմանադրական նորմ է: Միաժամանակ, կարծում ենք, որ երթի կազմակերպիչները պարտավոր են ավելի մեծ ուշադրություն դարձնել ցույցի օրինական ընթացքի շարունակության վրա, որպեսզի որեւէ մեկը չիրականացնի ապօրինի գործողություններ: Դժբախտաբար, օրենքի խախտումներով դեպքեր են եղել»,-այսօր կայացած ՀՀԿ ԳՄ նիստից հետո անդրադառնալով վարչապետ Սերժ Սարգսյանի եւ ՀՀԿ-ի դեմ ընթացող ցույցերին, լրագրողների հետ զրույցում ասաց ՀՀԿ խոսնակ, ԱԺ փոխնախագահ Էդուարդ Շարմազանովը:
Նա նշեց՝ ՀՀԿ ԳՄ անդամներն իրավապահների աշխատանքը դրական են որակում. «Մենք որպես զուսպ ենք գնահատում ոստիկանների պրոֆեսիոնալ պահվածքը: Կարծում ենք, որ քաղաքական գործընթացները պետք է ընթանան քաղաքական երկխոսության ճանապարհով: Մաքսիմալիստական ճանապարհներն ընդունելի չեն: Գտնում ենք, որ խնդիրները պետք է լուծվեն սահմանադրական գերակայությունից ելնելով»:
Էդուարդ Շարմազանովը ձեռնպահ մնաց ցուցարարների արարքները վերլուծելուց, նաեւ դատապարտեց այս օրերին լրագրողների հանդեպ իրականացված բռնությունները:
Լուիզա ՍՈՒՔԻԱՍՅԱՆ
