2016 թվականին ոստիկանության ՊՊԾ գունդը գրաված ու ծանր հանցագործությունների կատարման համար մեղադրվող «Սասնա ծռեր» խմբի անդամներից 11-ի գործով դատական նիստն այսօր մեկնարկեց դատավոր Արշակ Վարդանյանի նախագահությամբ:
Հիշեցնենք, որ այս գործով նախորդ դատավորի՝ Արթուր Օհանյանի լիազորությունները դադարեցվել էին եւ որպես նոր դատավոր նշանակվել է Արշակ Վարդանյանը:
Նա այսօր ոչ թե գործի քննությունը նորից սկսեց, այլ որոշեց շարունակել ընդհատված տեղից: Ամբաստանյալներին սակայն ոստիկանները դատարան չէին բերել: Դատավորը ներկա մի քանի պաշտպաններին հայտնեց, որ տեղեկություններ չունի ամբաստանյալներին չներկայացնելու պատճառների մասին:
Նիստը հետաձգվեց եւ դատավորի որոշմամբ այդ գործի քննությունը կկայանա յուրաքանչյյուր ուրբաթ, ժամը 11.00-ին:
Ամբաստանյալներից Արամ Մանուկյանի շահերի պաշտպան Հարություն Բաղդասարյանը լրագրողների հետ զրույցում համոզմունք հայտնեց՝ «իշխանությունն այնքան վախեցած է, որ ոստիկանները կալանավորներին դատարաններ չեն բերում, որովհետեւ որոշակի մտավախություններ ունեն»: Հարություն Բաղդասարյանը, սակայն, համոզված է, որ ցույցերը չեն կարող խնդիրներ առաջացնել ամբաստանյալներին դատարան տեղափոխելու առնչությամբ:
Լուիզա ՍՈՒՔԻԱՍՅԱՆ
