«Եթե ապրիլի 24-ին Սերժ Սարգսյանը լինելու է Ծիծեռնակաբերդում, ենթադրում եմ, որ մարդիկ ուզում են այդ օրն առերես հանդիպում կազմակերպել նրա հետ»,- հարցին՝ պատրաստվո՞ւմ են ապրիլի 24-ին ցույցեր և այլ նախաձեռնություններ իրականացնել, այսպես պատասխանեց ՀՀ ԱԺ ԵԼՔ խմբակցության ղեկավար Նիկոլ Փաշինյանը:
Պարոն Փաշինյանը լրագրողների հետ զրույցում տեղեկացրեց, որ ապրիլի 24-ին մարդկանց հոսքն օգտագործելու հարցը դեռ կքննարկեն և եթե տեսնեն, որ այդ տարբերակն աջակցություն ունի, լրջորեն կմտածեն նաև դրա իրագործման մասին. «Ինչպե՞ս կարելի է չնախատեսել ինչ-որ բան. պարզ է՝ ՀՀ ցանկացած քաղաքացի ապրիլի 24-ին առնվազն պարտավոր է այցելել Ծիծեռնակաբերդ: Պիտի նախաձեռնենք, քանի որ այս իշխանության քայլերն անարգանք են ցեղասպանության, ապրիլյան զոհերի հիշատակին: Բայց այս պահին ես որևէ բան ասել չեմ կարող: Եթե ժողովուրդն ուզում է, որ այդպես լինի, պետք է ենթադրել, որ կարող նաև այդպես լինել»:
Լրագրողների հետ զրույցում պարոն Փաշինյանը վստահեցրեց՝ ի վերջո Բաղրամյան 26-ի դռները բացելու են իրենց առաջ:
Թերահավատությանը՝ ինչպե՞ս են դա անելու, եթե օր օրի ոստիկանությունն ավելի շատ թվով մարդկանց է բերման ենթարկում, պարոն Փաշինյանը տեղեկացրեց, որ դրան հասնելու են:
Նաև հայտնեց, որ բերման ենթարկվածների հարցերով զբաղվում է Արայիկ Հարությունյանը և կազմակերպում կարիքների գնահատում ու համապատասխան աջակցություն:
Տաթև ՀԱՐՈՒԹՅՈՒՆՅԱՆ
