Aravot.am-ի հետ զրույցում «Սիվիլնեթի» լրագրող Ալինա Նիկողոսյանը (լուսանկարում) պատմեց, թե ինչպես է ապրիլի 20-ին բռնության ենթարկվել կարմիր բերետավորների կողմից՝ իր մասնագիտական աշխատանքը կատարելու ժամանակ: Դեպքը կատարվել է Մաշտոց-Ամիրյան խաչմերուկում:
«Մեծ թվով կարմիր բերետավորներ էին հավաքված այդ պահին Մաշտոց-Ամիրյան խաչմերուկում ու քաղաքացիների էին բերման ենթարկում: Ես վազելով գնացի դեպի մեքենան, որի դուռը բաց էր, ուզում էի ներսը նկարել ու փորձել հասկանալ, թե ում են բերման ենթարկում, որովհետեւ չորս քաղաքացի էր մեքենայում: Ես ուղիղ եթերում էի, եւ երբ փորձեցի նկարել, կարմիր բերետավորը շատ ուժեղ հարվածեց մեջքիս: Ու այնքան ուժեղ, որ չհասկացա՝ ձեռքով է՞ր, հարվածում թե ինչ-որ առարկայով: Մեջքս հարվածից պարալիզացվեց, այդ կարմիր բերետավորին ասացի, որ հիմա ուղիղ եթերում է, իսկ ինքը հեգնանքով պատասխանեց. «Ուրախ եմ քո համար»,- Aravot.am-ին հայտնեց «Սիվիլնեթի» լրագրողը:
Դրանից հետո Ալինան չի կարողացել պարզել, թե ուր են ոստիկանները տարել մեքենա նստեցրած մարդկանց: Միայն տեղյակ է, որ այդ օրը երեսուն հոգու են տարել: Ալինան չի դիմել բժշկի, ասում է, որ հարվածի տեղը կարմրած է:
Նա նաեւ տեղյակ է, որ այսօր իր մեկ այլ գործընկերոջ՝ Անի Գրիգորյանի հեռախոսն են գողացել, նա եւս բռնության է ենթարկվել ապրիլի 21-ին՝ Ավանում:
Գոհար ՀԱԿՈԲՅԱՆ
Ալինա Նիկողոսյանի լուսանկարը՝ լրագրողի ֆեյսբուքյան էջից:
