Ստրասբուրգում այսօր մեկնարկեց Եվրոպայի խորհրդի խորհրդարանական վեհաժողովի (ԵԽԽՎ) գարնանային նստաշրջանը: ԵԽԽՎ հայկական պատվիրակության անդամ Էդմոն Մարուքյանը ԵԽԽՎ ամբիոնից հայտարարեց Հայաստանում այս օրերին տեղի ունեցող իրադարձությունների մասին: Պարոն Մարուքյանը ԵԽԽՎ լիբերալ դեմոկրատների քաղաքական խմբի նիստին հանդես եկավ զեկույցով՝ ներկայացնելով, որ ՀՀ ԱԺ պատգամավորներ Արարատ Միրզոյանը, Նիկոլ Փաշինյանը և Սասուն Միքայելյանը ձերբակալվել են: Ըստ նրա՝ Նիկոլ Փաշինյանն առևանգված է, քանի որ նրա գտնվելու վայրը հայտնի չէ:
Էդմոն Մարուքյանի փոխանցմամբ՝ ԵԽԽՎ ղեկավարությունը հրաժարվել է հայաստանյան իրադարձությունների վերաբերյալ հրատապ քննարկում կազմակերպելու՝ Էդմոն Մարուքյանի առաջարկությունն ընդունել: Իր ֆեյսբուքյան էջում Էդմոն Մարուքյանը հայտնեց՝ աբսուրդ է, որ ԵԽ անդամ երկրում տեղի ունեցող իրադարձությունների վերաբերյալ հրաժարվում են հրատապ քննարկում անցկացնել, մինչդեռ Սիրիայի հարցով, որն, ըստ էության ԵԽ անդամ երկիր չէ, հրատապ քննարկում է նշանակված:
Էդմոն Մարուքյանի փոխանցմամբ՝ Ստրասբուրգից ինքն այսօր կվերադառնա Հայաստան, չի մասնակցի ԵԽԽՎ հետագա նիստերին, իսկ ՀՀԿ-ական պատգամավորներն արդեն, ըստ Էդմոն Մարուքյանի տեղեկությունների, Ստրասբուրգում չեն. վերադարձել են ՀՀ:
Տաթև ՀԱՐՈՒԹՅՈՒՆՅԱՆ
