Փաստաբան Արայիկ Պապիկյանի կարծիքով, Սերժ Սարգսյանի հրաժարականից հետո ՀՀԿ-ն այլեւս հասարակությունում տեղ չունի:
«Ես միշտ վստահ էի, որ ժողովուրդը հաղթելու է, ու ազատվելու ենք այն իշխանությունից, որը կեղեքում էր մեզ, երբեք կասկած չեմ ունեցել. շնորհավորում եմ համայն հայությանն այս հաղթանակի կապակցությամբ: Կասկած չեմ ունեցել, որ Սերժ Սարգսյանը ժողովրդի ճնշման տակ պետք է հեռանա»,- ասաց Հանրապետության հրապարակում հավաքված ցուցարարներին միացած Արայիկ Պապիկյանը:
Ըստ նրա՝ հայությունը երբեք այսքան միաբան չէր եղել. «ՀՀԿ-ն այլեւս տեղ չունի ՀՀ հասարակությունում, նրանք ժամ առաջ բոլոր հիմնական պաշտոններից պետք է հրաժարվեն ու իշխանությունն իրապես հանձնեն ժողովրդին. խորհրդարանն այլեւս լեգիտիմ չէ ու երբևէ լեգիտիմ չի եղել, նրանք զավթել են հայ ժողովրդի իշխանությունը ու իրավունք չունեն որոշում կայացնեն: Նրանք, որոնք համարում էին՝ Սերժ Սարգսյանն անփոխարինելի է, այդ կասկածները հիմա պետք է փարատվեն, որ անփոխարինելիներ չկան, ՀՀԿ-ն այլեւս ԱԺ-ում չպետք է լինի, նոր ընտրություններ պետք է լինեն»:
Արփինե ՍԻՄՈՆՅԱՆ
