Քիչ առաջ Հանրապետության հրապարակում մեկնարկեց հանրահավաքը: «Մերժիր Սերժին» նախաձեռնության անդամ Արմեն Գրիգորյանը կոչով դիմեց արցախցիներին: Ասաց`համոզված եղեք, որ այս շարժումը ամրապնդելու է հենց Արցախի անվտանգությունը:
«Սերժ Սարգսյանն Արցախի գլխավոր մարտահրավերն էր: Իր իշխանության տարիներին Հայաստանից 370 հազար քաղաքացի է արտագաղթել, ՀՀ 1 միլիոն քաղաքացի աղքատության մեջ է ապրել, նրա սխալ քաղաքականության արդյունքում ապրիլյան պատերազմում մարդկային եւ տարածքային կորուստներ ենք ունեցել: Այս շարժումը չեզոքացրել է Արցախի ամենավտանգավոր վտանգը»,- ասաց Արմեն Գրիգորյանը` հավելելով, որ ժողովրդավար եւ ազատ Հայաստանը Արցախի գլխավոր անվտանգության երաշխիքն է: Հայտարարեց`Հայաստանը սոցիալ տնտեսական զարգացում է ապրելու եւ մենք այլեւս Ադրբեջանի հետ 1980-ականների զենքով չենք կռվելու:
Հանրահավաքում նոր կարգախոս ծնվեց. «Ազատ Արցախ, Հայաստան»:
Հանրահավաքում հայտարարվեց, որ շարժմանն են միանում տարբեր համայնքների ղեկավարներ եւ ավագանիներ: Հնչեց Ծաղկահովիտ համայնքի անունը, այն միավորված համայնք է`տասը գյուղերով: Նաեւ` Իջեւան համայնքի ավագանիները, «Երեւանի հարակից մարզերի երիտասարդ գործարարների միավորումը», 18 հյուպատոսներ: Հյուպատոսների անունները չհայտարարվեցին:
Երեւանի ավագանու «Ելք» խմբակցության եւ ՔՊ-ի անդամ Էդուարդ Աղաջանյանն ընթերցեց խաղաղ անհնազանդության ակցիաների կետերը`այլեւս չվարել փակ համարանիշներով մեքենաներ, չգերազանցել արագությունը, ավտոմեքենաներով մուտք չգործել ժողովրդի մեջ Հանրապետության հրապարակում, գիշերը` 22.45-ից հետո ազդանշաններ չարձակել, անսթափ վիճակում ղեկին չնստել եւ այլն: Նա կոչ արեց չհիասթափվել, չհուսահատվել եւ չտրվել սոցիալական ցանցերում տեղեկատվական սադրանքներին:
Հայտարարվեց նաեւ, որ իշխանությունները սկսել են ճնշումներ կիրառել`մարդկանց գազն են անջատել, բայց «որեւէ մեկին վախեցնել հնարավոր չէ»:
Նելլի ԳՐԻԳՈՐՅԱՆ
իսկ կարո՞ղ է որ մարդկանց գազն են անջատել, որովհետեւ անոնք մերժում են անոր սակը մուծել… հետեւելով այդ մասին Յեղափոխութեան մասնայատուկ կոչին…