Նեխուրի տերեւները, ի տարբերություն ցողունների, ավելի սուր համ ունեն, եւ բոլորին չէ, որ դուր են գալիս: Սակայն այս աղցանի մեջ դրանց սուր համը գրեթե ամբողջությամբ կորչում է, եւ վայելելով շատ համեղ մի ուտեստ, միաժամանակ կստանաք բազմաթիվ օգտակար վիտամիններ եւ հանքանյութեր, որ կան նեխուրում:
Անհրաժեշտ մթերքները
Նեխուր- 1 կապ
Նուռ- 1 հատ
Ընկույզ- 0,5 բաժակ (կարող եք փոխարինել դդմի կամ արեւածաղիկի սերմերով)
Թթվասեր- 4-5 ճաշի գդալ
Սխտոր-1 պճեղ
Ձիթապտղի յուղ-2 ճաշի գդալ
Աղ, սեւ պղպեղ- ըստ ճաշակի
Պատրաստման եղանակը
Լավ լվացեք նեխուրն ու նուռը: Շատ-շատ մանր կտրատեք նեխուրի տերեւներն ու ցողունները: Ավելացրեք նռան հատիկները: Թթվասերի մեջ լցրեք ձիթայուղը, մանր կտրատած սխտորն ու ընկույզը, աղն ու պղպեղը, լավ խառնեք եւ ավելացրեք նեխուրին ու նռան հատիկներին: Լավ խառնեք եւ մատուցեք:
Ի դեպ, ստորեւ տեղադրված լուսանկարներում կարող եք տեսնել նուռը կտրելու շատ հարմար տարբերակ: Նուռը երկայնքով բաժանում եք երեք մասի` մեջտեղի հատվածը մի փոքր ավելի լայն, վերեւի եւ ներքեւ հատվածները` իրար հավասար: Ընդ որում` կտրում եք միայն կեղեւը, հատիկներին դանակ չի կպնում, դրանից հետո բաժանում եք մասերի: Այս կերպ կտրելու պարագայում նռան գրեթե ոչ մի հատիկ չի վնասվում, չի թափվում:
Բարի ախորժակ:
Պատրաստեց Մելանյա ԲԱՐՍԵՂՅԱՆԸ
Ի դէպ, ոչ թէ ՛՛կորում է՛՛, ինչը հասարակաբանութիւն է, այլ կորչում է, որ հայերէն է։
Շնորհակալություն, վրիպակն արդեն ուղղված է:
դուք իրոք իմաստուն անձ էք, Տիկին Բարսեղյան…
երանի ձեզի
այս օրերին, հոգեկան դեղի, բալասանի նման կարդացի ձեր այս յօդուածը, նայեցայ նկարներին…
շնորհակալութիւն