«Սպառողների խորհրդատվության կենտրոն» հ/կ ղեկավար Կարեն Չիլինգարյանն այսօր «Զարկերակ» մամուլի ակումբում լրագրողների հետ հանդիպմանը ներկայացրեց այն խնդիրները, որոնք, իր դիտարկմամբ, առաջնահերթ պետք է լուծի նոր կառավարությունը: «Սպառողի իրավունքների պաշտպանությամբ զբաղվող կառույց չունենք, քաղաքացին միայն դատարանի վրա կարող է հույս դնել: Նման կառույց է պետք ստեղծել»,-հայտարարեց Կարեն Չիլինգարյանը: Ապա նա անդրադարձավ գազի, էլեկտրաէներգիայի, ջրի սակագնին եւ համոզմունք հայտնեց, որ այն պետք է վերանայվի:
«Պետք է նոր հաշվարկներ անել, որպեսզի սպառողը խաբված չլինի: Էլեկտրաէներգիայի սակագինն, օրինակ, պետք է արդարացի կերպով որոշվի, ոչ թե որոշ ատյաններում՝ մեկ պայմանավորվածությամբ: Համոզված եմ, որ ավելի ցածր սակագին պետք է ունենա»,-նկատեց Կարեն Չիլինգարյանը:
Ինչ վերաբերում է երեւանյան հասարակական տրանսպորտին, ապա Չիլինգարյանի խոսքով՝ նախորդ տարվանից քաղաքապետարանում գործող մասնագիտացված խումբը, որի անդամ է նաեւ ինքը, առաջարկներ է նախապատրաստել: «Առաջիկա մեր քննարկմանը տրանսպորտի սակագնի հարցն է դրվելու: Դա կախած է նրանից, թե ինչ տեսակի տրանսպորտ է օգտագործվելու եւ ինչ վճարային համակարգ է գործելու: Եթե անգամ սակագինը բարձրանա, ապա շատ չնչին չափով: Մոտավոր հարյուր դրամ պետք է լինի, այլապես խնդիրներ կառաջանան»,-եզրափակեց Կարեն Չիլինգարյանը:
Լուիզա ՍՈՒՔԻԱՍՅԱՆ
Թող պայմանագրերի վրա ուշադրություն դարձնեն, որ սակագին չկա նշված մեջը