«Իրանին սահմանակից Թուրքմենստանը գազային ռեսուրսներ ունեցող երկրների հնգյակում է. ունի խոշոր էներգետիկ ռեսուրսներ, բայց եւ խնդիրներ՝ դրանք արտահանելու առնչությամբ: Այդ ռեսուրսներն ուղղված են հիմնականում Չինաստան, բայց էներգառեսուրսների գների անկման պատճառով Թուրքմենստանը ելքեր է փնտրում դեպի Արեւմուտք»,-«Sputnik Արմենիա» մամուլի կենտրոնում այսօր լրագրողների հետ հանդիպմանն անդրադառնալով հունվարին կայացած ՀՀ վարչապետի, Իրանի եւ Թուրքմենստանի դեսպանների հանդիպմանը, ասաց իրանագետ Վարդան Ոսկանյանը: Հիշեցնենք, որ հանդիպմանը քննարկվել են մասնավորապես էներգետիկայի ոլորտում եռակողմ գործակցության հնարավորությունները:
Ըստ Վարդան Ոսկանյանի, Թուրքմենստանի էներգակիրների սպառման համար որպես ելք կարող է լինել ՀՀ-ն. «ՀՀ-ն պետք է դրական իմաստով ավելի ագրեսիվ քաղաքականություն վարի այն ոլորտներում, որտեղ մեզ այդքան էլ չեն սպասում: Մեր երկիրը կարող է ստանալ տնտեսությունը զարգացնելու լուրջ հնարավորություններ: Իրան-ՀՀ-Թուրքմենստան ձեւաչափի ստեղծումը կնպաստի Իրան-ՀՀ-գազ-էլեկտրաէներգիա ձեւաչափի ընդլայնմանը, դրանում կարող են ընդգրկվել նաեւ ՌԴ-ն եւ Վրաստանը»:
Իրանագետը նկատեց, որ ադրբեջանական փորձագիտական շրջանակներն անմիջապես արձագանքել են ՀՀ վարչապետի եւ դեսպանների հանդիպմանը, ինչը ցույց է տալիս, որ Ադրբեջանում անհանգստություն է առաջացել: Սակայն, ըստ Վարդան Ոսկանյանի, ՀՀ տնտեսական օրակարգը չպետք է կապել հակառակորդների արձագանքների հետ, այլ անհրաժեշտ է աշխատել նշյալ եռակողմ ձեւաչափի ստեղծման ուղղությամբ:
Վարդան Ոսկանյանը նաեւ կարծիք հայտնեց, որ ռուսական քաղաքականությունն այստեղ նախընտրում է մասնակցային, այլ ոչ թե խոչընդոտելու մոտեցումը:
Կարդացեք նաև
Լուիզա ՍՈՒՔԻԱՍՅԱՆ
