ՀՀ արտակարգ եւ լիազոր դեսպան Արման Նավասարդյանը համոզված է, որ ռուս-թուրքական հարաբերությունների կայունությունը բխում է ՀՀ շահերից եւ չի կիսում կարծիքը, որ այդ հարաբերությունների վատթարացմամբ պետք է ուրախանալ: «Եթե վատանան ռուս-թուրքական հարաբերությունները, Ադրբեջանը կօգտվի դրանից»,-«Հայելի» մամուլի ակումբում այսօր խոսելով սահմանադրական բարեփոխումներ իրականացրած Թուրքիայի արտաքին քաղաքականության մասին՝ կարծիք հայտնեց նա:
Թե որքանով է Արցախյան հակամարտության հարցը կախված ռուս-թուրքական հարաբերություններից, դիվանագետի խոսքով. «Ռուսաստանը չի ուզում, որ ռազմական գործողություններ ծավալվեն… «Լավրովի պլան» չկա, Արցախի հարցը փակուղի է մտել: Ինչո՞ւ պետք է Ռուսաստանն ուզենա, որ Արցախի հարցը լուծվի ոչ հօգուտ Արցախի, ինչպես Թուրքիան է կամենում»:
Մեր նկատառմանը, թե Լավրովը վերջերս ասաց՝ կողմերը որոշակի պայմանավորվածություններ են ձեռք բերել, այդ դեպքում ինչի՞ շուրջ են բանակցում, Արման Նավասարդյանն այսպես արձագանքեց. «Որոշակի տարածքների եւ կարգավիճակի շուրջ: ՀՀ-ն երբեք չի գնա այն բանին, որ ԼՂՀ կարգավիճակը մնա օդում կախված՝ հողերի հարցը բացելու դեպքում: Բայց Ադրբեջանն էլ ասում է, որ կարգավիճակի հարցը չլինող է»:
Կարդացեք նաև
Լուիզա ՍՈՒՔԻԱՍՅԱՆ
