Երևանում այսօր առաջին անգամ հանդիպեցին ներդրողներ ՀՀ-ից եւ Թուրքիայից, որոնք մտադիր են մեր երկրում խթանել «Հրեշտակ»-ներդրողների ցանց ստեղծելու գաղափարը: «Հրեշտակ»-ներդրողները մեծահարուստներ են, որոնք համաձայնում են ֆինանսավորել սկսնակ բիզնես-ծրագրեր: Հանդիպման մասնակիցներից էր Սիլիկոնյան հովտում տեղակայված «Էնջել լաբս» ընկերության տնօրեն Թուգչե Էրգյուլը:
Նա լրագրողներին պատմեց, որ իր տատիկը հայ էր, սակայն վերջինիս հետ շփվել չի հասցրել. «Չհասցրեցի նրա հետ հայերեն խոսել, Հայաստանի մասին լսել: Նա երիտասարդ մահացավ»:
Դառնալով հայ եւ թուրք ներդրողների հանդիպմանը՝ նա համոզմունք հայտնեց, որ այն ՀՀ-ի եւ Թուրքիայի միջև տնտեսական հարաբերությունները զարգացնելու միջոց է:
«Հույս ունեմ, որ հայ և թուրք ներդրողները կգան ընդհանուր հայտարարի, եւ այս նախաձեռնությունը հաջողություններ կգրանցի»,-ասաց Թուգչե Էրգյուլը: Նա համոզված է՝ թեեւ ՀՀ-ի եւ Թուրքիայի միջեւ դիվանագիտական հարաբերություններ չկան, ժողովուրդները կարող են գործակցել. «Երբ նրանք կապեր հաստատեն, փորձով փոխանակվեն, քաղաքականությունն ինքը կհետևի դրան: Հայերը և թուրքերը նման են, նրանք սիրում են միմյանց, պարզապես շփումներ են պետք»:
Կարդացեք նաև
Հավելենք, որ հայ եւ թուրք ներդրողների հանդիպման նախաձեռնողներն են Հանրային լրագրության ակումբը(ՀԼԱ) եւ Թուրքիայի տնտեսական քաղաքականության հետազոտությունների հիմնադրամը:
Լուիզա ՍՈՒՔԻԱՍՅԱՆ
(լուսանկարը՝ Հանրային լրագրության ակումբի)
