Հախվերդյանը Ազատության հրապարակում պատմում է բաղնիքի մարմնավաճառի եւ Զորի Բալայանի մասին

Ազատության հրապարակում շարունակվում է երգիչ, երգահան Ռուբեն Հախվերդյանի մասնակցությամբ «Երկիր Ծիրանի» կուսակցության ամփոփիչ հանրահավաք-համերգը:

Համերգի ժամանակ Հախվերդյանը ժամանակ առ ժամանակ մեկնաբանություններով է հանդես գալիս:

Նա որտեղից որտեղ հիշեց Զորի Բալայանին եւ նրա նամակը՝ ՌԴ նախագահ Վլադիմիր Պուտինին. «Մի հատ գարշելի երեւույթ կա, որ մտավորական է կոչվում՝ Զորի Բալայան, նամակ էր գրել ռուսաց թագավորին, մի անգամ համարձակություն ունեցավ ասելու, որ մենք ռուսների «ֆորպոստն» ենք: Ես էլ հեռուստատեսությամբ երեք մատի կոմբինացիա ցույց տվեցի եւ ասեցի՝ քո համար կարող ա սա բան ա, բայց մեզ համար սա հայրենիք ա»:

Հետո Հախվերդյանը Ազատության հրապարակում պատմեց, թե ինչպես է բաղնիքում հանդիպել մի մարմնավաճառուհու. «Վերջերս շատ դեպքեր են լինում, որ ինձ հրավիրում են բաղնիքներ ու այնտեղ նենց խեղճուկրակ աղջիկներ են գալիս՝ վաճառելու իրենց մարմինը: Մի անգամ մի աղջկա հարցրի, ասի՝ ինչքա՞ն ա օրականդ, 300-անոց էր, ասեց՝ դե, մի 1000-1500: Այդ ամեն ինչին հասցրել է այս սոցիալական խայտառակ վիճակը: Ես ավելի բարոյական եմ համարում էդ կանանց, որոնք վաճառում են իրենց մարմինը, քան մեր հոգեվաճառներին, որոնք կոչվում են էսօր կառավարություն, որոնք իրենց հոգին են էսօր սատանային ծախել»:

Հանրահավաքի վերջում, խոսելով Զարուհի Փոստանջյանի մասին՝ նա ասաց. «Զարուհին ուղղամիտ, ուղղախոս, մի քիչ էլ չափից դուրս ճշմարտություններ ասող մարդ ա: Բոլորի վրա կարող եմ կասկածել ծախվածության եւ այլն, բացի Զարուհուց: Մենք նրան սիրում ենք ճիշտ էնքան, ինչքան ֆրանսիացիները սիրում էին Ժաննա դ’Արկին: ԱԺ-ում մի հատ տղամարդ կար, էն էլ թարսի պես կին ա դուրս եկել»:

Հռիփսիմե ՋԵԲԵՋՅԱՆ