«Ինչո՞ւ ՌԴ-ն մինչ այդ չէր պարզ արտահայտվում այդ խնդրի մասին: Դա Ադրբեջանի կողմից մարդու իրավունքների կոպիտ խախտում է»,-Aravot.am-ի հետ զրույցում ասաց ՀՀ առաջին օմբուդսման, իրավապաշտպան Լարիսա Ալավերդյանը:
Հիշեցնենք, որ օրերս ՌԴ ԱԳՆ-ն հայտարարությամբ հանդես եկավ՝ Ադրբեջանից պահանջելով դադարեցնել ՌԴ քաղաքացիների, այդ թվում՝ հայկական ազգանունով քաղաքացիների հանդեպ խտրական վերաբերմունքը՝ այդ երկիր ժամանելիս: Հաղորդագրությունում նշվում էր, որ անգամ բերման ենթարկվելու դեպքեր են գրանցվել:
Հայ լինելու պատճառով ձերբակալության մասին էր ահազանգվել նաեւ Մարատ Ուելդանով-Գալուստյանի դեպքում, որն ապրիլին Բաքվում դատապարտվեց 8 տարվա ազատազրկման:
«Ուելդանովի հարցն ավելի բարդ է, քան Լապշինինը: Լապշինով հետաքրքրվում են, այդ թվում՝ Իսրայելը, իսկ Ուելդանովը մնում է ՌԴ պատասխանատվության վրա: Մեկ ամիս առաջ լուր ստացանք առ այն, որ Մարատի քրոջն ասել են՝ դու վերջին անգամ ես լսում եղբորդ ձայնը»,-նշեց Լարիսա Ալավերդյանը:
Նրա խոսքով՝ մինչ օրս չեն կարողանում իմանալ՝ Ուելդանովի իրավունքներով որեւէ մեկը զբաղվո՞ւմ է. «Քրոջը հորդորել ենք դիմել բոլոր միջազգային ատյաններին: Միայն միջազգային ատյանների ուշադրությունը կարող է փրկել այդ տղային»:
Մանրամասն՝ տեսանյութում:
Լուիզա ՍՈՒՔԻԱՍՅԱՆ
