«Մենք, որպես Եվրոպայի քաղաքացիներ եւ հարկատուներ, պահանջելու իրավունք ունենք»,- այսօր «Եվրոպայի ներգրավվածությունն Արցախում» արշավի ներկայացման ժամանակ կարծիք հայտնեց Բելգիայի հայկական կազմակերպությունների ֆեդերացիայի ընդհանուր համակարգող Շահնուր Մինասյանը: Խոսքն աjն մասին է, որ եվրոպական երկրներում բնակվող եւ այդ երկրներում հարկատու հայերն իրավունք ունեն պահանջելու, որպեսզի Արցախի նկատմամբ` մյուս չճանաչված պետությունների նման, Եվրոպան հավասար մոտեցում ցուցաբերի եւ տարբեր ծրագրեր իրականացնի:
Քարոզարշավի շրջանակներում նախատեսվում է Եվրոպայում բնակվող հայերի ստորագրահավաք: Այն սկսվել է հունիսի 7-ին: Շահնուր Մինասյանն ասաց, որ երկու հազար ստորագրություն կա, բայց թիվը քիչ է, քանի որ 800 հազար հայ է բնակվում Եվրոպայում: «Կոչ ենք անում միանալ եւ ցույց տալ, որ Արցախն իր արժեհամակարգով ձգտում է դեպի Եվրոպա եւ ճիշտ չէ, որ անտեսված է: Սա քաղաքական քարոզարշավ չէ, հասարակական նախաձեռնություն է, որ հնարավոր լինի եվրոպական քաղաքացիական կազմակերպությունների միջոցով կապ հաստատել Արցախի եւ Եվրոպայի միջեւ»,- ասաց նա:
Այլ մանրամասները` տեսանյութում
Ստորագրահավաքի ամփոփումից հետո, ինչը կլինի հավանաբար աշնանը, դրանք կներկայացվեն եվրոպական տարբեր կառույցներին`պահանջով`չանտեսել Արցախը:
Բայց արշավը ստորագրահավաքով չի ավարտվելու, աշխատանքները շարունակական են լինելու:
ՀԲԸՄ Հայաստանի տնօրեն Դալար Կազանջյանն ասաց, որ Արցախում տարբեր ծրագրեր են իրականացնում, բայց շատ կարեւորում են հատկապես այս արշավը: «ԵՄ-ն Արցախում ներգրավելը, ինքնանպատակ չէ. նպատակն է փոխել մարդկանց կարծիքն ու իրազեկել իրականությունը: Մենք ուզում ենք, որ տարբեր միջազգային կառույցներ ներգրավվեն այս գործում: Սկսել ենք ԵՄ-ից: ՀԲԸՄ-ի նպատակն Արցախի ժողովրդի համար բարեկեցիկ կյանքի ապահովումն է, մարդկանց իրավունքների պաշտպանությունը»,- ասաց նա:
Նելլի ԳՐԻԳՈՐՅԱՆ
