Աջափնյակ եւ Դավիթաշեն վարչական շրջանների ընդհանուր իրավասության դատարանում այսօր դպրոցների եւ մանկապարտեզների տնօրենների գործով նիստն էր, քննվում էր Երեւանի թիվ 64 դպրոցի տնօրեն Երանուհի Հարությունյանի հայցը:
Հիշեցնենք, որ 30 դպրոցների եւ մանկապարտեզների տնօրեններ դատի էին տվել «Իրազեկ քաղաքացիների միավորում» հասարակական կազմակերպությանը՝ «ՀՀԿ-ն չարաշահում է վարչական ռեսուրսը դպրոցներում եւ մանկապարտեզներում» վերտառությամբ աղմկահարույց հրապարակման եւ ձայնագրությունների համար:
Դատավոր Անի Մխիթարյանը հայտնեց, որ հայցվոր Երանուհի Հարությունյանը պատշաճ ծանուցվել է, սակայն չի ներկայացել. նա դիմում է գրել դատավորին առ այն, որ հրաժարվում է հայցից: Դատավորը նշեց, որ իր վարույթում հինգ նման հայցադիմում կա եւ բոլոր հայցվորներն էլ հրաժարվել են հայցից:
Լրագրողների հետ զրույցում «Իրազեկ քաղաքացիների միավորման» համակարգող Դանիել Իոաննիսյանը նկատեց՝ տնօրենները հասկացել են, որ չեն կարող գործը հաղթել, քանի որ կազմակերպությունը գործել է օրինաչափ:
«Մենք որեւէ մեկին չենք զրպարտել, հնարավոր չէ հերքել այն, ինչ իրականություն է»,-ասաց նա:
Մանրամասն՝ տեսանյութում
Լուիզա ՍՈՒՔԻԱՍՅԱՆ
