«Սեպտեմբերից զարգացումներ կլինեն տարածաշրջանում, Հայաստանն էլ հնարավորություն ունի դրանք հասկանալու: Մասնավորապես, տարածաշրջանում Թուրքիայի ազդեցության թուլացումը հանգեցնելու է Իրանի նշանակության եւ դերի բարձրացմանը: Այս առումով կարեւոր էր ՀՀ նախագահի այցը Իրան»,-«Փաստարկ« մամուլի ակումբում այսօր ասաց արեւելագետ, թուրքագետ Ռուբեն Սաֆրաստյանը:
Նա նկատեց, որ Հարավային Կովկասից միայն ՀՀ-ն էր նախագահի մակարդակով ներկայացված Իրանի նախագահ Հասան Ռոհանիի երդմնակալության արարողությանը. «Սա վկայում է, որ ՀՀ-ի եւ Իրանի հարաբերությունները երկկողմանի մակարդակից դառնում են տարածաշրջանային գործոն, որը կայունացնող դեր ունի»:
Փորձագետի խոսքով՝ այն հանգամանքը, որ Ադրբեջանն արարողությանը նախագահի մակարդակով չի մասնակցել, ցույց է տալիս, որ Ադրբեջանը փորձում է լրջորեն վերանայել տարածաշրջանային քաղաքականությունը. «Մի կողմից չի մասնակցում նախագահի երդմնակալությանը՝ դրանով ուղերձ հղելով ԱՄՆ-ին, թե հետեւում է վերջինիս քաղաքականությանը տարածաշրջանում, մյուս կողմից, առանց պատճառի՝ հրաժարվում է Վրաստանում ՆԱՏՕ-ի զորավարժություններին մասնակցել: Սա էլ ուղերձ էր Ռուսաստանին»:
Լուիզա ՍՈՒՔԻԱՍՅԱՆ
