Դեկտեմբերին Իրանի նախագահ Հասան Ռոհանիի եւ ՀՀ նախագահ Սերժ Սարգսյանի միջեւ հանդիպման ժամանակ Ռոհանին խնդրանք է թողել Սերժ Սարգսյանին եւ սպասում է, որ վերջինս կատարի այն եւ չանտեսի Իրանի շահերը ՀՀ տարածքում: Այս մասին այսօր «Պոստ Սկրիպտում» մամուլի ակումբում հայտարարեց քաղաքագետ Սերգեյ Շաքարյանցը: «Այդ խնդրանքն է՝ Արաքս գետի մաքրման հարցը: Մտավախություններ կան նաեւ Ամուլսարի հետ կապված: Ոսկու արդյունահանումը բերում է էկոհամակարգի խախտմանը, պղտորվում են ստորգետնյա ջրերը եւ այլն»,-նշեց նա:
Մյուս խնդրանքը, ըստ քաղաքագետի, այն է, որ ապահովված չէ իրանական բանկերի անխոչընդոտ գործունեությունը ՀՀ տարածքում. «Չգիտեմ ինչու է դա Իրանին պետք, չենք կարող իմանալ, բայց դեկտեմբերին նման պահանջ է դրվել, ու չի կատարվել»:
Շաքարյանցը հարց բարձրացրեց. «Ունա՞կ է Սերժ Սարգսյանը լուծել այդ հարցերը: ՀՀ-ի եւ Իրանի միջեւ շարունակվում են շփումները խորհրդարանական եւ ՊՆ մակարդակներում, բայց մեր բազմաշերտ հարաբերությունները սպասում են այդ հարցերի լուծմանը»:
Լուիզա ՍՈՒՔԻԱՍՅԱՆ
