«Ադրբեջանի նախագահի հայտարարություններն ավելի քան անհեթեթ են: Եթե Ալիեւ կրտսերն այդ տարիներին Ստամբուլում զբաղված չլիներ միլիոններ կուտակելով, լիներ Ադրբեջանում եւ մասնակից լիներ այդ դեպքերին, դժվար թե նման անհեթեթ հայտարարություններ աներ եւ մեղադրեր ՀՀ իշխանություններին, ՀՀ նախագահին»,- «Առավոտի» հետ զրույցում ասաց ԱԺ փոխնախագահ Էդուարդ Շարմազանովը:
Երեկ ՄԱԿ-ի Գլխավոր ասամբլեայի 72-րդ նստաշրջանում Ադրբեջանի նախագահ Իլհամ Ալիեւը մեղադրեց ՀՀ նախագահ Սերժ Սարգսյանին Խոջալուի դեպքերն անձամբ կազմակերպելու համար, նրան ռազմական հանցագործ անվանեց ու կրկին խոսեց Հայաստանի կողմից Ադրբեջանի «օկուպացված 20 տոկոսի» մասին եւ կոչ արեց պատժամիջոցներ կիրառել Հայաստանի դեմ: Էդուարդ Շարմազանովը խորհուրդ է տալիս Ադրբեջանի ներկայիս նախագահին գոնե կարդալ այդ տարիներին Ադրբեջանի նախագահ Այազ Մութալիբովի հարցազրույցը «Վեդոմոստի» թերթին: Այդ հարցազրույցում Այազ Մութալիբովը հստակ հայտարարում է` Խոջալուի դեպքերի միակ մեղավորը, պատասխանատուն եւ հեղինակը «Ադրբեջանի ազգային ճակատ» միավորումն է: «Մեղադրել Հայաստանին եւ Արցախին Խոջալուի դեպքերի համար՝ նույն բանն է, որ Հիտլերը ԽՍՀՄ-ին եւ ԱՄՆ-ին մեղադրեր Երկրորդ աշխարհամարտի ժամանակ հրեաների Հոլոքոստի համար: Կարծում եմ՝ Ալիեւի ասածին այլեւս իր երկրում լուրջ չեն վերաբերվում: Կարող է բացառություն լինեն Նյու Յորքում նրան ուղեկցող տիկինն ու աղջիկը»,- ասաց մեր զրուցակիցը:
