ԱԺ-ում «Զինապարտության եւ զինվորական ծառայության մասին» օրենսդրական նոր կարգավորումների մասին խորհրդարանական լսումները շարունակվում են: Պաշտպանության նախարար Վիգեն Սարգսյանը ներկայացրեց, թե ինչ են իրենք առաջարկում նախագծով, «Պատիվ ունեմ», «Ես եմ» ծրագրով:
Նա խոսեց բնակարանային ապահովման մասին, որը սոցիալական պաշտպանվածության տեսանկյունից լուրջ խնդիր է. «Սա մեզ համար հարցերի հարցն է: Մենք ունենք օրենքում որոշակի պարտավորություն, որ շատ վատ բնակարանային պայմաններ ունեցող սպան ծառայության իքս տարում կարող է հերթագրվել եւ երբեւէ ստանալ անվճար բնակարան: Ծրագիրը հետեւողական իրականացվել է եւ տարիների ընթացքում 1700 սպա անվճար բնակարան է ստացել, դա բավականին մեծ ֆինանսական բեռ է եղել: Բայց չեմ կարծում, որ դա լուծել է լուրջ խնդիր: Այդ կարգավորումները մեծ խնդիրներ են ստեղծել: Սպան արհեստականորեն վատթարացրել է իր բնակարանային պայմանները, օտարել է բնակարանը, չի գրանցել իրեն հասանելիք ժառանգությունը, որպեսզի ցույց տա, որ ինքը ունի բնակարանի կարիք: Արդյունքում՝ մենք ունենք հսկայական ցուցակ, 1700-ը ստացել են, երկու այդքան էլ հերթագրված են եւ հույսը կորցրած սպասում են, որ բնակարանով կապահովեն: Մենք այս կարգը առաջարկում ենք փոխարինել հատուկ բնակարանային ծրագրով»:
Նախարարը ծրագրի մանրամասները չասաց, նոյեմբերին նոր կասի, թե ինչ են առաջարկում այս մասով: Միայն մի փոքր բացեց փակագծերը. հիփոթեքային հարմար պայմաններ են ներկայացնելու, որ յուրաքանչյուր սպա մեկ անգամ կարողանա այդ ծրագրից օգտվել՝ անկախ իր բնակարանային պայմաններից, որ ստիպված չլինի ինչ-որ բան կեղծել: Սպան ծրագրում գրանցվելուց երեք տարի հետո բնակարան կարող է ստանալ՝ այդ բնակարանի համար մայր գումարը վճարելով 20 տարիների ընթացքում, ամսական 60-70 հազար դրամ վճարելով: Նա կարող է վարձով տալ այդ տունը եւ այդ 70 հազար դրամը վճարել ոչ թե գրպանից, այլ՝ վարձավճարից ստացված գումարով»:
Նախարարն ասաց, որ դեռ հաշվարկում են, սա դեռ վերջնական չէ:
Հռիփսիմե ՋԵԲԵՋՅԱՆ
