Այսօր Սահմանադրական դատարանի նիստին մասնակցում էր ԱԺ նախկին պատգամավոր Հրայր Թովմասյանը, իսկ Գագիկ Հարությունյանը, որն ընտրվել է Բարձրագույն դատական խորհրդի նախագահ, այլեւս նիստում չկար:
ՍԴ անդամները նախ շնորհավորեցին Հրայր Թովմասյանին՝ ՍԴ անդամ դառնալու կապակցությամբ: Սակայն Թովմասյանին «դեբյուտը» կարճ տեւեց՝ գործի քննությունը գրավոր ընթացակարգով էր:
Իսկ ՍԴ-ն քննության էր ընդունել Գյումրիում Ավետիսյանների դաժան սպանության գործով տուժողների իրավահաջորդներ Լուսինե Ավետիսյանի, Անահիտ Կոշտոյանի, Անդրանիկ Պողոսյանի, Նարինե Պողոսյանի դիմումը: Դիմումում բարձրացվել է ՀՀ քրեական դատավարության օրենսգրքի այն նորմերի սահմանադրականության հարցը, որոնցով պայմանավորված տուժողների իրավահաջորդները զրկվել են ոչ նյութական վնասի հատուցման պահանջ ներկայացնելու հնարավորությունից։
ՍԴ-ն զեկուցող է նշանակել Ալվինա Գյուլումյանին: Նա ասաց, որ գործը պատրաստ է խորհրդակցական սենյակում որոշում կայացնելու համար, ստացվել է պատասխանող կողմի բացատրությունը, անհրաժեշտ բոլոր փաստաթղթերը կան. «Կարծում ենք, կարող ենք անցնել խորհրդակցական սենյակ՝ որոշում կայացնելու»:
Որոշումը կհրապարակվի քիչ անց:
Հռիփսիմե ՋԵԲԵՋՅԱՆ
