ԴԵՌ ՉԵՆ ՄՈՌԱՑԵԼ, ԹԵ ՔՈՉԱՐՅԱՆՆ ԻՆՉՊԵՍ ԷՐ 10 ՏԱՐԻ ԽԱԲՈՒՄ

Երեկ ասուլիսում անդրադառնալով այն փաստին, որ Ռոբերտ Քոչարյանը մարտի 9-ին Փարիզում հանդիպել է Ժակ Շիրակին՝ «Ժառանգություն» խմբակցության ղեկավար Ստյոպա Սաֆարյանն ասաց. «Որքան էլ թաքցվի կամ հերքվի այն փաստը, որ նրա կողմից փորձ է արվում վերադառնալ քաղաքականություն՝ միեւնույն է, դա իրականությունը չէ: Ռոբերտ Քոչարյանն ունի այդպիսի ցանկություն: Բայց ես գրեթե վստահ եմ, որ նրան դա չի հաջողվի: Նա ոչ միայն ներքին, այլ նաեւ արտաքին լուրջ աջակցություն չի ունենա այդ գործընթացում: Աշխարհը չի մոռացել, թե ինչպես է նա 10 տարի խաբելով ման եկել, խոստումներ տվել եւ ոչինչ չի կատարել: Աշխարհը հիշում է, թե նա ինչպես հանձնեց իշխանությունը»: Ըստ նրա՝ սրանք ոչ թե իր գնահատականներն են, այլ արտերկրի շատ հեղինակավոր անձանց, որոնց անունները չհրապարակեց:

Կարդացեք նաեւ՝

ՍԱԴԱԹ, ՌԱԲԻՆ... Ո՞Վ Է ՀԱՋՈՐԴԸ

«Արդեն իսկ կա մանրամասն լուծում (Ղարաբաղի հարցի –խմբ.), շատ-շատ մեծ անելիքներ չեն մնացել, եւ ավելի շատ խնդիրը քաղաքական մակարդակի է: Պետք է հասկանալ, որ լուծումը կարեւոր է, եւ պետք է լինել պատրաստ ներպետական սպասվող բանավեճին: Մենք գիտենք նմանատիպ այլ գործընթացներից, որ երբեմն, թերեւս, շատ փոքր ինչ-որ խմբեր կարող են շատ կատաղի պայքարել լուծման դեմ ելնելով՝ տարբեր դրդապատճառներից, եւ ծայրահեղացնեն: Հիշենք՝ ինչ տեղի ունեցավ Ռաբինի հետ, երբ Իսրայելը եւ Եգիպտոսն էին խաղաղության գործընթաց նախաձեռնել, եւ գիտեք նախագահ Սադաթի հետ ինչ պատահեց: Սա պետք է հասկանալ, նախագահները երբեմն այս հարցի մասին մտածում են»,- երեկ ՆԱՏՕ-ի ԽՎ-ի «Ռոուզ Ռոութ» սեմինարի ժամանակ հայտարարեց ԵԱՀԿ ԽՎ-ում Ղարաբաղի հարցով հատուկ զեկուցող Գորան Լենմարկերը:

Կարդացեք

ՆՈՐ ՃԱՆԱՊԱՐՀԱՅԻՆ ՔԱՐՏԵ՞Զ

ԱՄՆ-ը Հայաստանի եւ Ադրբեջանի միջեւ ճանապարհային քարտեզ է մշակում: Այդ մասին «ԱրմԻնֆո»-ի թղթակցի հետ զրույցում հայտարարել է թուրքական «Արդարություն եւ զարգացում» կառավարող կուսակցության անդամ Սուաթ Քինիքլիօղլուն: «Ինչպես գիտեք, Թուրքիան Ղարաբաղի հետ կապված պայմաններ է առաջ քաշել, եւ մենք հուսով ենք, որ ԱՄՆ-ի կողմից ներկայացվելիք ճանապարհային քարտեզը կյանքի կկոչվի: Այդ դեպքում, համոզված եմ, ճանապարհային քարտեզը, որին սատարել են Հայաստանի եւ Թուրքիայի նախագահները, թույլ կտա թուրքական կողմին առաջ շարժվել Հայաստանի հետ հարաբերությունների կարգավորման գործընթացում»,- նշել է թուրք խորհրդարանականը:

ԿԱՌԱՎԱՐՈՒԹՅՈՒՆԸ ՄԵՐԺԵՑ

Մարտի 11-ին ՀՀ կառավարությունը մերժել է ՀՅԴ խմբակցության պատգամավորների օրենսդրական նախաձեռնությունը՝ «Միջազգային պայմանագրերի մասին» օրենքում փոփոխություններ կատարելու վերաբերյալ: ՀՀ ԱԳ նախարարի տեղակալ Շավարշ Քոչարյանի ասելով, օրինագծում ներկայացված էր երեք մոտեցում՝ անվավեր ճանաչել միջազգային պայմանագիրը, քանի դեռ այն ուժի մեջ չի մտել, ԱԺ-ին օժտել իր վերապահումները արձանագրել միջազգային պայմանագրում արձանագրելու լիազորությամբ, եւ մինչեւ այն ուժի մեջ մտնելը՝ դադարեցնել ստորագրման ընթացակարգը, եւ սահմանել այն դեպքերն ու հիմնավորումները, որոնց հիման վրա կարելի լինի դադարեցնել ստորագրման ընթացակարգը կամ կիրառել վերապահումներ:

ՄԵՐԺԵՑ՝ ԱՌԱՆՑ ԱՌԱՐԿՈՒԹՅՈՒՆ ՆԵՐԿԱՅԱՑՆԵԼՈՒ

Երեկ ՀՀ կառավարությունը քննության է առել ՀՀ ԱԺ մի խումբ պատգամավորների՝ օրենսդրական նախաձեռնության կարգով ներկայացրած նախագծերի փաթեթը, որը վերաբերել է ՀՀ քրեական եւ ՀՀ քրեական դատավարության օրենսգրքերում փոփոխություններ կատարելուն: Դրանցով առաջարկվում էր դատական սանկցիաներ կիրառել դատարանի նկատմամբ անհարգալից վերաբերմունք դրսեւորելու, դատական նիստի բնականոն ընթացքը խոչընդոտելու եւ այլնի համար: Գործադիրը փաթեթի վերաբերյալ սկզբունքային առարկություն չի մատնանշել:

ՀԱՅՈՑ ԱՇԽԱՐՀ

Փառատոն Սլովենիայում

Սլովենիայում անցկացվում է «Հայաստան. մոտիկ եւ հեռու...» մշակութային փառատոնը: Փառատոնը բացվել է Սլովենիայի նախագահի, առաջին տիկնոջ եւ մշակույթի նախարարի ներկայությամբ:

Ֆիլմ Բեռլինում

Բեռլինի «Գերմանիայի պատմական թանգարանի» կինոդահլիճում տեղի է ունեցել «Մոխիրն ու փյունիկը» փաստավավերագրական ֆիլմի ցուցադրումը՝ նվիրված Հայոց ցեղասպանությանը:

Զեկույց Նիկոսիայում

Մարտի 13-ին Նիկոսիայի Հայոց առաջնորդարանում Հայկ Դեմոյանը կներկայացնի «Ցեղասպանության թանգարանը եւ հայ-թուրքական արձանագրությունները» խորագրով զեկույցը:

ՄԱՍԱՄԲ ԸՆԴՈՒՆԵԼԻ ՀԱՄԱՐԵՑ

ՀՀ կառավարությունը երեկ մասամբ ընդունելի է համարել ՀՀ ԱԺ մի խումբ պատգամավորների՝ ՀՀ քաղաքացիական, ՀՀ քրեական, ՀՀ քրեական դատավարության օրենսգրքերում փոփոխություններ կատարելու առաջարկ պարունակող օրինագծերի փաթեթը: Դրա ընդունումը, փաստաթղթի հեղինակների համոզմամբ, նպատակ ունի կարգավորել խոսքի ազատության չարաշահման հետ կապված հասարակական հարաբերությունները: Այս առնչությամբ կառավարությունը մի շարք առաջարկություններ է ներկայացրել, որոնց ընդունման դեպքում օրենքի նախագծերը ընդունելի կհամարի:

ՍՈՒՐԽՈՒԴՅԱՆԻ ՆԿԱՏՄԱՄԲ ՀԵՏԱՊՆԴՈՒՄԸ ԴԱԴԱՐԵՑՎԵՑ

ՀՀ ոստիկանության քննչական գլխավոր վարչության Երեւանի քննչական բաժնում դադարեցվել է բնապահպան Մարիամ Սուրխուդյանի նկատմամբ հարուցված քրեական գործի վարույթը: Մարիամը, որը մեղադրվում է թիվ 11 հատուկ դպրոցի ուսուցիչ Լ. Ավագյանի բարի համբավը արատավորող տեղեկություններ տարածելու համար, փաստորեն, ճիշտ դուրս եկավ: Նախաքննական մարմինը հարուցել է քրեական գործ Լ. Ավագյանի նկատմամբ՝ անչափահասների նկատմամբ անառակաբարո գործողություններ կատարելու համար:

ՈՒՐԲԱԹՕՐՅԱ ԵՐԹ

Այսօր ՀԱԿ երիտասարդական թեւի ներկայացուցիչները հերթական ուրբաթօրյա բողոքի երթ են անցկացնելու ավանդական՝ քաղբանտարկյալներին ազատ արձակելու պահանջով: «2010թ. մարտի 9-ին ՀՀ վերաքննիչ դատարանը կատարեց իշխանությունների հերթական պատվերը՝ Նիկոլ Փաշինյանին դատապարտեց երեքուկես տարվա ազատազրկման: Նիկոլի, ինչպես եւ մյուս քաղբանտարկյալների նկատմամբ շարունակվող այս քաղաքականությամբ իշխանություններն ապացուցում են իրենց խուճապի մեջ գտնվելու փաստը, փորձում ճորտացնել մեզ՝ ՀՀ քաղաքացիներիս»,- երեկ այսպիսի հայտարարություն են տարածել ՀԱԿ-ի երիտասարդները՝ կոչ անելով ՀՀ քաղաքացիներին միանալ «հանուն ազատության, հանուն Հայաստանի» իրենց պայքարին:

ՍՏՈՐԱԳՐԱՀԱՎԱՔԸ  ՇԱՐՈՒՆԱԿՎՈՒՄ Է

ՀԱԿ գրասենյակներում ամբողջ թափով ընթանում է Հանրային ծառայությունները կարգավորող հանձնաժողովի կողմից գազի սակագնի բարձրացման դեմ դատարան դիմելու հայցին քաղաքացիների միանալու գործընթացը: Հայ ազգային կոնգրեսի մամուլի խոսնակ Արման Մուսինյանը news.am-ի հետ զրույցում նշել է, որ Կոնգրեսն իր առջեւ որպես նշաձող դրել է մոտ հազար համահայցվորներով դատարան դիմելու նպատակ, սակայն ցանկացողները շատ ավելին են: Մուսինյանը նշել է, որ համահայցվորների ստորագրահավաքը շարունակվում է, ու առաջիկա օրերին պարզ կլինի, թե որքան մարդ է միացել Կոնգրեսի պահանջին: