«Հայաստանի Հելսինկյան կոմիտեի» նախագահ, իրավապաշտպան Ավետիք Իշխանյանն այսօր «Մեդիա կենտրոն»-ում լրագրողների հետ հանդիպմանը ներկայացրեց իրենց կառույցի՝ ժամանակին արված զեկույցներից տվյալներ, որոնք վերաբերում են «Երկրապահ կամավորականների միությանը» եւ վերջինիս նախագահ, գեներալ, Արցախի հերոս Մանվել Գրիգորյանին, որի պահեստներում, հիշեցնենք, ԱԱԾ-ն օրերս աղմկոտ բացահայտումներ արեց. Գրիգորյանը կալանավորված է:
Ավետիք Իշխանյանի խոսքով՝ Էջմիածնում, որի նախկին քաղաքապետ՝ Գրիգորյանի որդի Կարեն Գրիգորյանն օրերս հրաժարական տվեց, Մանվել Գրիգորյանի իշխանությունն այնպիսին էր, որ ով նրան մեքենայով վազանց էր անում, պետք է ծեծ ուտեր, իսկ որ մեքենան գեներալին դուր գար՝ նրանը պետք է լիներ:
«1995թ.-ին, ԵԿՄ-ի առաջին «սխրագործությունը» յոթ կրոնական կազմակերպությունների ծեծուջարդն էր: Անգամ սպանություններ եղան՝ ազգային հողի վրա, իբր նրանք առաքելական չեն, ուստի հայ չեն: Այն ժամանակ ընդդիմադիր քաղաքական ուժերն այդ դեպքը չքննադատեցին՝ մտքում ասելով, որ նրանց հասնում էր»,-պատմեց Ավետիք Իշխանյանը:
Նրա խոսքով, նույն թվականին «սեփական մեթոդներով» ընտրություններ կազմակերպելով հայտնի ԵԿՄ-ականները Ազատության հրապարակում ծեծուջարդ են կազմակերպել, ու էլի ոչ մեկ չի պատժվել. «Ժամանակի ընթացքում նրանց տրվեցին բիզնեսներ, սեփականություններ՝ մինչեւ մեր օրերը»:
Անդրադառնալով Մանվել Գրիգորյանի գործունեությանը՝ Ավետիք Իշխանյանը մի դեպք պատմեց. «Գորիսում 90-ականներին, երբ նա ապրում էր հայտնի գեներալներից մեկի տանը, փողոցից աղջիկներ են բռնի տարել այնտեղ: Աղջիկներից մեկի հայրը գնացել էր այդտեղ, հորը ծեծել են ու նկուղ գցել, նա կաթվածից մահացել է: Հայտնի է, որ մի անգամ էլ Մանվել Գրիգորյանը բիլիարդի ձողը մտցրել է մեկի փորը»:
Իրավապաշտպանը համոզմունք հայտնեց, որ ԵԿՄ-ն պետք է լուծարվի:
ՈւՂԻՂ։ ԵԿՄ-ի եւ Մանվել Գրիգորյանի մասին խոսում են Ավետիք Իշխանյանը եւ Հրանուշ Խառատյանը
Gepostet von Aravot am Mittwoch, 20. Juni 2018
Հիշեցնենք, որ Մանվել Գրիգորյանի գործով քննություն է ընթանում, իսկ նրա պաշտպանները հանրությանը հորդորում են չխախտել անմեղության կանխավարկածը եւ սպասել դատավճռին:
Լուիզա ՍՈՒՔԻԱՍՅԱՆ
