«Մենք գիտենք վարչապետի բարձր վարկանիշի մասին: Նրա ուժը կլինի առաջինը: Գիտակցելով դա՝ նպատակ ունենք դառնալ երկրորդ ուժը՝ այն ուժը, որը կլինի փոխզսպող»,-«Հայելի» մամուլի ակումբում այսօր լրագրողների հետ հանդիպմանն անդրադառնալով դեկտեմբերի 9-ին սպասվելիք արտահերթ խորհրդարանական ընտրությունների արդյունքում ձեւավորվելիք նոր Ազգային ժողովի կազմին, հայտարարեց Էդմոն Մարուքյանի գլխավորած «Լուսավոր Հայաստան» կուսակցության խորհրդի անդամ Գեւորգ Գորգիսյանը:
Նրա խոսքով՝ ներկայիս քաղաքական դաշտում միայն «Լուսավոր Հայաստանն» է այն ուժը, որն ունի բավարար ներուժ եւ կադրեր՝ պրոֆեսիոնալ քաղաքականություն վարելու եւ ճիշտ կերպով փոխզսպելու համար. «Նոր խորհրդարանում նոր մշակույթ պետք է լինի՝ քաղաքական բազմակարծություն: Բանավեճերի արդյունքում ավելի լավ լուծումներ պետք է լինեն, քան լուծարված խորհրդարանում, որտեղ ՀՀԿ-ն գալիս-ասում էր՝ «մենք մեծամասնություն ենք, եւ վերջ, այլեւս ոչ մի քննարկում»…Ուստի նոր խորհրդարանում մենք կլինենք այդ փոխզսպող ուժը»:
Գորգիսյանի համոզմամբ՝ ԱԺ-ում միահեծան իշխանությունը չի կարող լավը լինել, այն տանելու է լճացման. «Դա հակասում է նաեւ ժողովրդավարությանը»:
Լուիզա ՍՈՒՔԻԱՍՅԱՆ
