Լրահոս
Օրվա լրահոսը

Ռուբեն Հայրապետյանը նախաձեռնել է Տնտեսագիտական համալսարանում շրջանավարտների ցանցի ստեղծում

Հունվար 08,2019 17:20

8.01.2019թ., Երևան

Հարգելի գործընկերներ

Հայաստանի պետական տնտեսագիտական համալսարանի ռեկտորի պաշտոնակատար, տ.գ.դ., պրոֆեսոր Ռուբեն Հայրապետյանը հանդես է եկել համալսարանի շրջանավարտների ցանց ստեղծելու նախաձեռնությամբ: Ռուբեն Հայրապետյանի հայտարարությունը ներկայացնում ենք ստորև:

Հարգելի՛ գործընկերներ, Հայաստանի պետական տնտեսագիտական համալսարանի, Երևանի պետական տնտեսագիտական ինստիտուտի, Երևանի ժողովրդական տնտեսության ինստիտուտի սիրելի՛ շրջանավարտներ՝ բոլոր տարիների,

Համալսարանի ռեկտորի պաշտոնակատար նշանակվելուց ի վեր բազմաթիվ նամակներ եմ ստանում գործարարության ոլորտի տարբեր ներկայացուցիչներից, պետական պաշտոնյաներից, միջազգային ծրագրերի կառավարիչներից, ովքեր իրենց պատրաստակամությունն են հայտնում համագործակցելու համալսարանի հետ: Նրանցից շատերը մեր համալսարանի տարբեր տարիների շրջանավարտներ են, ովքեր համագործակցելուց զատ ուզում են որևէ կերպ օգտակար լինել համալսարանին և կապ հաստատել հարազատ բուհի հետ:

Մենք հզոր ներուժ ունենք, որը մինչև այժմ պատշաճ կերպով չենք իրագործել: Զբաղեցնելով տարբեր պատասխանատու պաշտոններ՝ ինչպես Հայաստանում, այնպես էլ արտերկրում, մեր համալսարանի տարբեր տարիների շրջանավարտները բուհի շուրջը ձևավորել են մի հսկայական ռեսուրսային բազա, որը կանոնակարգված կերպով ավելացված արժեք չի ստեղծել: Հաշվի առնելով այս հանգամանքը, ինչպես նաև առաջիկա տարիներին տնտեսագիտական համալսարանի զարգացման գերակայությունները՝ գաղափար է առաջացել՝ շրջանավարտների ցանց ստեղծելու, որը կապող օղակ պետք է դառնա համալսարանի և տարբեր տարիների շրջանավարտների միջև:

Նախաձեռնության հիմնական գաղափարը փոխշահավետության ու պատրաստակամության ահռելի ներուժն օգտագործելն է և համագործակցությունը կանոնակարգելը: Օրինակ, բազմաթիվ գործընկերներից ստանում եմ նույնատիպ մեկնաբանություններ, որ կա ցանկություն բաց դասեր կազմակերպելու, ուսանողներին հրավիրելու կազմակերպություններ, փորձառության հնարավորություն ընձեռելու, լավագույններին ընտրելու հետագա աշխատանքի համար, սակայն կոմունիկացիայի պակասի պատճառով հաճախ ոչինչ չի արվում: Ընդ որում, խոսքը չի վերաբերում միայն բարձր պաշտոններ զբաղեցնողներին:

ազմակերպությունների ստորին օղակների շատ աշխատակիցներ ցանկանում են ներգրավել ուսանողներին որպես ժամանակավոր օգնական՝ միաժամանակ նրանց սովորեցնելով գործի առանձնահատկությունները: Սա լավ հնարավորություն է նաև իրագործելու մեր առաջիկա նպատակներից մեկը, այն է՝ ուսանողները պետք է փորձառության տարբեր շրջափուլեր անցնեն՝ սկսած ուսումնառության երկրորդ տարվանից, և ոչ թե աշխատաշուկայի հետ շփվեն միայն չորրորդ տարում:

Բացի վերոնշյալից, միավորումը պետք է լայն կոմունիկացիոն հնարավորություններ ընձեռի շրջանավարտներին՝ ազատ մուտք ուսանողների տվյալների բազա, դասավանդելու ցանկության և կոմպետենտության դեպքում անմիջական կապ համապատասխան ամբիոնների հետ, բաց դասերի կազմակերպում յուրաքանչյուր պահի, համալսարանի գործունեության բարելավման ուղղությամբ առաջարկությունների ներկայացման համապատասխան հարթակ և ընդհանրապես՝ կամայական ծրագիր, նախաձեռնություն, որը կապահովի շրջանավարտի կապը համալսարանի հետ և կնպաստի ցանցի ձևավորմանը: Սա հարմար հարթակ կարող է դառնալ նաև գործատուների միջև համագործակցության համար՝ որպես հավելյալ արդյունք: Առանձին դերակատարում կարող են ունենալ արտերկրում ապրող և աշխատող մեր շրջանավարտները:
Բոլոր նրանց, ովքեր ցանկություն ունեն տնտեսագիտական համալսարանի նկարագրված ցանցի մասնիկը դառնալու, օգտվելու ընձեռված հնարավորություններից և մշտական կապ ապահովելու հարազատ բուհի հետ, առաջարկում ենք անցնել հետևյալ հղումով և լրացնել կից ձևաչափը: Կարող եք նաև [email protected] և [email protected] էլեկտրոնային հասցեներին ուղարկել հետևյալ տվյալները՝

-անուն-ազգանունհայրանունը,

-բուհն ավարտելու տարեթիվը,

-աշխատավայր, պաշտոն (անգամ, եթե այս պահին չեք աշխատում),

-հեռախոսահամարներ և կոնտակտային այլ տվյալներ,

-CV (ցանկության դեպքում): 

Այս նախնական տվյալներն անհրաժեշտ են բազան ստեղծելու և կառավարելու համար: Կարևորությամբ պայմանավորված՝ ցանցի ձևավորման աշխատանքներն իրականացվելու են անձամբ իմ վերահսկողության ներքո:

Հարգանքով և համագործակցության մեծ պատրաստակամությամբ՝

Ռուբեն Հայրապետյան

Հայաստանի պետական տնտեսագիտական համալսարանի ռեկտորի պաշտոնակատար

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Հունվար 2019
Երկ Երե Չոր Հնգ Ուրբ Շաբ Կիր
« Դեկ   Փետ »
 123456
78910111213
14151617181920
21222324252627
28293031