Լրահոս
Օրվա լրահոսը

Հայկական ու եվրոպական իրականություն

Փետրվար 07,2020 13:00

Զուգահեռներ «դրսում» պրակտիկա անցնող Հայաստանում ֆրանսիական համալսարանի ուսանողներից

Ավանդույթի համաձայն՝ Հայաստանում ֆրանսիական համալսարանի ուսանողները պրակտիկա են անցնում արտասահմանում:
«Առավոտը» զրուցել է նրանցից մի քանիսի հետ, որոնց պրակտիկան դեռ շարունակվում է:

Հեղինե Խաչատրյանը` մարքեթինգի ֆակուլտետից, պրակտիկա է անցնում Շվեյցարիայում: Ասում է՝ ընդհանուր առմամբ, շատ տպավորված է, բայց մի բան կար, որ ամենաշատն էր իրեն տպավորել. «Մարդիկ աշխատում են շաբաթական 5 օր, օրական 9-10 ժամ։ Սկզբից մտածում էի՝ ինչպես են հասցնում: Հետո հասկացա, որ փաստացի պլանավորման ու օրը ճիշտ կազմակերպելու արդյունքում ստանում են հանգստի եւ աշխատանքի համատեղման գեղեցիկ համադրություն»։ Հեղինեն ցանկանում է պրակտիկայի ընթացքում ստացած փորձը՝ կապված ձմեռային սպորտաձեւերի եւ գեղեցիկ բնություն ունեցող Վեղբիեի զարգացման հետ, կիրառել «Աշոցքը որպես ձմեռային սպորտի կենտրոն»  ծրագրում։  Ողջ Շվեյցարիան ոտքի տակ տված ուսանողուհին զուգահեռներ է տանում. «Շվեյցարիայի ու Հայաստանի բնությունը, սարերը, օդի ու ջրի մաքրությունը ամենաակնհայտ ընդհանրություններն են։ Ցավոք, ի տարբերություն Հայաստանի, մարդիկ Շվեյցարիայում մտածում են բնության մասին, ավելի գեղեցկացնում այն,  ոչ ոք գետնին աղբ չի գցում, եղած աղբն էլ տեսակավորում են»:

Կառավարման ֆակուլտետի ուսանողուհի Միլենա Ավետիսյանը պրակտիկա է անցնում Փարիզի Cablerie Daumesnil հաստատությունում, որը զբաղվում է էլեկտրական կաբելների մեծածախ առք ու վաճառքով։ Նա եւս տպավորված է, քանի որ կարճ ժամկետում մեծ ծավալի գիտելիք է ստացել ու փորձ ձեռք բերել: «Իմ գործի ընթացքում շատ հաճախ անհրաժեշտություն է լինում մեծ քանակությամբ գործերը արագ անելու, արագ կողմնորոշվելու, նոր մոտեցում ցուցաբերելու, տարբեր նոր եւ հին ծրագրերով աշխատելու, ինչը ինձ մոտ հեշտ է ստացվում, քանի որ ինձ օգնում են Հայաստանում ֆրանսիական համալսարանում ստացած գիտելիքներս»: Միլենան հույս ունի, որ պրակտիկայի վերջում լիարժեք կտիրապետի աշխատանքային գործունեության բոլոր յուրահատկություններին: Նա հասցրել է նաեւ տեսարժան վայրեր այցելել. «Անհնար կլիներ հասնել Փարիզ ու չվայելել նրա  գեղեցկությունը։ Եղել ենք մի շարք թանգարաններում, ներառյալ Օրսեի թանգարանը, Լուվրը… Շնորհիվ մեր պատասխանատուի՝ UGAB France-ի ներկայացուցիչ Զարուհի Օդաբաշյանի, որը մեզ համար հետաքրքիր ծրագիր է կազմել՝ այցելում ենք մի շարք փարիզյան վայրեր»: Զուգահեռներ անցկացնելով ֆրանսիական եւ հայաստանյան իրականության միջեւ, նա նշում է. «Ֆրանսիացիները սենտիմենտալ են եւ բարյացակամ։ Կարելի է իրենցից շատ բաներ սովորել հատկապես սպասարկման ոլորտի հետ կապված։ Միաժամանակ իրենք միշտ պայքարում են իրենց իրավունքների համար։ Ի տարբերություն իրենց, հայերս ավելի հանդուրժող եւ համակերպվող ենք։ Նաեւ իրենց համար միշտ զարմանալի է հայերի շատ լեզուներ իմանալը։ Երբ իմ կազմակերպությունում անհրաժեշտություն կար ռուսերեն խոսելու, իրենք շատ զարմացան եւ միաժամանակ ուրախացան։ Հայերի մոտ ավելի հեշտ է ստացվում լեզուներ սովորելը, քան իրենց մոտ»։

Հայկ Հովհաննիսյանը եւս կառավարման ֆակուլտետից է: Նա շարունակում է  պրակտիկան  Փարիզի «Գրանտ Թորոնտոն Ֆրանսիա» աուդիտորական գրասենյակի գլխամասում:

«Պրակտիկայի ընթացքում հասցնում եմ շփվել ֆանսիական աշխատամիջավայրի հետ, ոլորտի արհեստավարժ մասնագետների ղեկավարությամբ աշխատելը ոչ միայն աշխատանքային, այլ նաեւ ուսուցողական տեսանկյունից չափազանց օգտակար է։ Տպավորված եմ գործընկերներիս աշխատասիրությամբ, օգնելու պատրաստակամությամբ եւ բարձր ճշտապահությամբ։ Ֆրանսիական կրթությունը ինձ օգնում է ավելի արագ արձագանքել խնդիրներին, իսկ ստացած գիտելիքներս բավարարում եմ պատվով կատարել հանձնարարությունները եւ առաջ քաշել նոր, արդյունավետության տեսանկյունից կարեւոր առաջարկներ»,-ասում է մեր զրուցակիցը։ Նա վստահ է, որ պրակտիկայի ավարտին կունենա բավարար կարողություններ՝ ֆրանսիական մշակույթ ունեցող ընկերություններում աշխատելու համար, քանի որ օգտագործում է ֆրանսիական գործիքներ:  «Ֆրանսիացիները եւ երկրի մշակույթին հարմարված հյուրերը ճշտապահ են, ավելի գործնական, որոշ հարցերում ավելի պատասխանատու։ Ցավոք, Հայաստանում մարդիկ հիմնականում աշխատանքին այդքան պատասխանատու կերպով չեն վերաբերվում։ Մյուս կողմից, հայերն ավելի լավ են հարմարվում իրավիճակներին, առավել իրատես են»,-հավելում է նա։

Նույն ֆակուլտետից Հայկ Գաբրիելյանը պրակտիկան անցկացնում է Բելգիայի Բրյուսել քաղաքում՝ Ֆրեշմեդ սուպերմարկետում: «Շատ տպավորված եմ ղեկավարների եւ անձնակազմի վերաբերմունքից, նրանց ջանքերի շնորհիվ ես շատ հեշտ կարողացա ինտեգրվել բելգիական աշխատանքային միջավայրին։ Բացի այդ, շատ զարմացրեց այն, որ տվյալ խանութում ես գտա այդքան մեծ հայկական խմիչքների եւ ապրանքների տեսականի: Ինձ հանձնարարված աշխատանքներն իրականում բավականին տարբեր բնույթի են. միաժամանակ զբաղվում եմ ե՛ւ տվյալ խանութի ֆեյսբուքյան էջը զարգացնելով, ե՛ւ տվյալների բազայի վերլուծությամբ, ե՛ւ բելգիական եւ հայկական շուկաների, ինչպես նաեւ հարկային համակարգերի տարբերությունների վերհանմամբ։ Իհարկե, առանց այն բոլոր գիտելիքների եւ հմտությունների, որ ձեռք եմ բերել Ֆրանսիական համալսարանում, այս ամենը իրականացնելը  անհնար կլիներ։ Մի կողմից պրակտիկայի ավարտին ակնկալում եմ, որ տվյալ կազմակերպության SMM-ը կլինի բարձր մակարդակի վրա եւ բացի այդ, կատարված վերլուծությունների հաշվին հնարավոր կլինի հասկանալ եւ նվազեցնել այն ծախսերը, որոնք նախորդ տարիներին ապարդյուն են կատարվել։ Մյուս կողմից՝ հուսով եմ, որ ամբողջովին կհասկանամ, թե սուպերմարկետի կառավարումն ինչ է իրենից ներկայացնում եւ տվյալ շուկայում առկա մեխանիզմներն ինչպես կարող են ինտեգրվել հայկական շուկա»,-նշում է նա։ Նա հասցրել է լինել Բրյուսելի լավագույն վայրերում, տեսնել Թագավորական պալատը, համտեսել հանրահայտ բելգիական շոկոլադը։ «Հայաստանի համեմատ՝ Բրյուսելում հանրային տրանսպորտն անհամեմատ լավն է, սակայն Հայաստանն ունի առավելություն հարկային ոլորտում։ Բելգիան համարվում է Եվրոպայի ամենահարկվող պետությունը եւ հաճախ լինում են դեպքեր, որ մարդիկ նախընտրում են ունենալ ավելի ցածր աշխատավարձ, քանի որ աշխատավարձի փոքր բարձրացումն իսկ կարող է հանգեցնել եկամուտների նվազման»,-նշում է երիտասարդը։

Իրավաբանական ֆակուլտետի ուսանող Անահիտ-Աննա Մկրտչյանն այժմ  պրակտիկան անցնում է Փարիզի Estrade, Azad & Harutyunyan իրավաբանական ընկերությունում։ «Բնականաբար, առանց համալսարանից ստացած ֆրանսերենի գիտելիքների, Փարիզում գոյատեւելը շատ դժվար կլիներ։ Ինչ վերաբերում է մասնագիտական գիտելիքներին, ապա վերջին երկու տարիներին Ֆրանսիայի իրավական համակարգի ուսումնասիրությունը, մասնավորապես՝ դատական համակարգի կառուցվածքի եւ քաղաքացիական իրավունքի հիմքը կազմող մի շարք հասկացությունների մասին ընդհանուր պատկերացումը օգնում է շատ հեշտ եւ արագ ինտեգրվել աշխատանքի մեջ»,-ասում է նա։ «Ի տարբերություն Հայաստանի, Ֆրանսիայում անշարժ գույքի հետ կապված գործարքների, մասնավորապես վարձակալության պայմանագրերի նկատմամբ խիստ իրավական կարգավորումներ են նախատեսված։ Այս ոլորտում, եւ ֆրանսիական իրավունքի ուսումնասիրությունն ընդհանրապես ընդլայնում է մտահորիզոնը, եւ զարգացնում է համեմատական ու քննադատական մոտեցումը… Դե էլ ինչ Փարիզ՝ առանց Էյֆելյան աշտարակի, Աստվածամոր տաճարի, Հաղթական կամարի եւ Մոնմարտր թաղամասի։ Փարիզում բնակելի շենքերն անգամ կարծես թանգարաններ լինեն»,-ասում է նա։

Մերի Կիրակոսյանը` ֆինանսների ֆակուլտետից, պրակտիկա է անցնում Ֆրանսիայի Մարսել քաղաքում գտնվող crռdit agricole բանկում: «Առաջին իսկ աշխատանքային օրվանից զգացել եմ կոլեկտիվի բարեհամբույր ու ջերմ ընդունելությունը՝ օգնելու, սովորեցնելու պատրաստակամությունը: Պրակտիկայի ավարտից հետո համոզված եմ, որ Հայաստան եմ վերադառնալու նոր, տարբերվող փորձ ձեռք բերած, որը կծառայի հետագա աշխատանքային միջավայրում։ Այցելելով ֆրանսիական այլ քաղաքներ՝ զգացել եմ դրանց միանգամայն տարբեր լինելը, բայց կարծում եմ, որ մարսելցիները  եւ Մարսելի հայությունն ավելի ջերմ են։ Ամեն երկիր, ժողովուրդ ունի իրեն բնորոշ առավելություններն ու թերությունները, իսկ ֆրանսիական խոհանոցի բազմազանությունը մի այլ հիացմունքի առարկա է»,-նշում է նա:

 Գոհար ՀԱԿՈԲՅԱՆ

«Առավոտ» օրաթերթ
06.02.2020

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Փետրվար 2020
Երկ Երե Չոր Հնգ Ուրբ Շաբ Կիր
« Հուն   Մար »
 12
3456789
10111213141516
17181920212223
242526272829