Այսօր՝ օգոստոսի 19-ին, Վանաձորի բժշկական կենտրոնում լույս աշխարհ է եկել 44-օրյա պատերազմում հերոսացած, լոռեցի Ռադիկ Հովակիմյանի եղբայրը: Փոքրիկին անվանակոչել են եղբոր՝ Ռադիկի անունով:
Հերոսածին մայրը՝ 42-ամյա տիկին Հայարփին, ասում է, որ տղան՝ Ռադիկը մահվան 40-րդ օր երազ է եկել իրեն՝ ասել, որ վերադառնալու է:
3.4 կգ քաշով, 51 սմ հասակով փոքրիկի ծնունդն ընդունել են բժշկական կենտրոնի մանկաբարձագինեկոլոգիական բաժանմունքի վարիչ Արամ Ավալյանն ու մանկաբարձ-գինեկոլոգ Արամայիս Դունամալյանը: Փոքրիկի ծնունդն ուրախացրել է ոչ միայն հարազատներին, այլեւ հիվանդանոցի ողջ անձնակազմին:
Կարդացեք նաև
Վանաձորի բժշկական կենտրոնի մամուլի ծառայությունից Aravot.am-ին փոխանցեցին, որ տիկին Հայարփին բժշկական կենտրոն է ընդունվել օգոստոսի 11-ին: Անցնելով անհրաժեշտ բոլոր հետազոտությունները, լինելով բժիշկների հսկողության տակ, այսօր փոքրիկը ծնվել է կեսարյան հատման ճանապարհով: Այժմ թե՛մայրիկի, թե՛ նորածնի վիճակը բժիշկները գնահատում են բավարար:
Ավագ Ռադիկը ծառայում էր Արցախում, մի քանի ամիս էր մնացել ծառայության ավարտին, երբ սկսվեց 44-օրյա պատերազմը: Պատերազմի 2-րդ օրը՝ սեպտեմբերի 28-ին, ԱԹՍ-ի հարվածից ծանր վիրավորում էր ստացել, ապա տեղափոխվել հիվանդանոց, որտեղ էլ հոկտեմբերի 5-ին ստացած ծանր վնասվածքների հետեւանքով մահացել:
Տաթեւիկ ՂԱԶԱՐՅԱՆ
