Բայց իրար չհամոզեցին
Երեկ «Դրո»-ի գործով զբաղվող դատարանի առջեւ նորից ողջ սրությամբ կանգնեց ամբաստանյալ Արսեն Արծրունու օրագիրը գործին կցելու խնդիրը։ Այդ օրագիրը հայտնաբերված է Արծրունուն պատկանող բնակարանում խուզարկության ժամանակ։ Հիշեցնենք, որ օրագրում զետեղված տեղեկությունների հիման վրա հարուցվել է քրեական նոր գործ եւ կատարվում է քննություն։
Այդ օրագրի հանդեպ ուշադրության պատճառն այն է, որ, ըստ Արծրունու, օրագիրը «սարքած» է քննության կողմից, եւ նա կարող է դա ապացուցել, եթե այն ներկայացվի դատարանին։ Արծրունին հայտարարեց նաեւ, որ իր բոլոր ցուցմունքները տվել է ճնշման տակ։
Այդ առթիվ դատապաշտպան Վ. Ավագյանը հանդես եկավ միջնորդությամբ՝ կցել գործին օրագիրը, ինչպես նաեւ նրա հետ կապված արձանագրությունները։ Փաստաբանները միաձայն պաշտպանեցին իրենց գործընկերոջ առաջարկը։ Օգտագործելով փաստաբանական պերճախոսության ողջ զինանոցը, նրանք փաստարկներ էին բերում նշված փաստաթղթերը գործին կցելու օգտին, կոչ էին անում չստեղծել կողմնակալ վերաբերմունքի տպավորություն, զգուշացնում էին, որ միջնորդության մերժումը դիտելու են որպես ամբաստանյալների պաշտպանության իրավունքի խախտում։
Կարդացեք նաև
Նույնքան վճռականորեն էր առարկում պետական մեղադրող Մ.Գրիգորյանը։ Դատապաշտպանների պահանջի մեջ նա տեսնում էր հետեւյալ միտումը. հրապարակել քրեական գործի նախաքննության համար անհրաժեշտ փաստաթղթերը, որի հետեւանքով կխախտվի Քրեական օրենսգրքի թիվ 133 հոդվածը եւ կխանգարվի նախաքննության օրինական ընթացքը։
Դատական կոլեգիայից պահանջվեց մեկ ժամից ավելի այդ հարցի կապակցությամբ որոշում ընդունելու համար։ Արդյունքում միջնորդությունը մերժվեց։ Ի պատասխան դրան, փաստաբան Վ.Ավագյանը հայտարարեց, որ մտադիր է բացարկ հայտարարել դատախազ Մ.Գրիգորյանին եւ ժամանակ խնդրեց այդ բացարկը ձեւակերպելու համար։
Դատական նիստը ընդհատվեց մինչեւ երկուշաբթի օրը։
Ե.ԱՎԵՏԻՍՅԱՆ
