Բռնցքամարտ-քաղաքականությանը զուգահեռ
Շաբաթ օրը երեկոյան հռչակավոր բռնցքամարտիկ Մայք Թայսոնը 4 տարվա ընդմիջումից հետո դուրս եկավ ռինգ: Մայքը երեք տարի անց էր կացրել բանտում՝ բռնաբարության մեղադրանքով։ Նրա հակառակորդը՝ Մաքնիլին, մրցամարտից առաջ շատ էր թռչկոտում, պարային-ջղաձգային շարժումներ էր անում, տատանվում ճոճանակի պես, հոխորտում, որ հեշտությամբ կջարդի Թայսոնին։ Բայց սկսվեց մրցամարտը, եւ Մայքի մի քանի հարվածը միանգամայն բավական էր, որպեսզի նրա մրցակիցը կորցներ հավասարակշռությունը (ֆիզիկական) եւ սոմնամբուլիկ տեսք ընդուներ։ Մրցամարտը տեւեց 93 վայրկյան։ Տեխնիկական նոքաութից հետո Մաքնիլին, բնականաբար, դժգոհում էր աշխարհի անարդարությունից։
Քաղաքական զուգահեռները թողնում ենք ընթերցողին։ Մի բան պարզ է սակայն. քաղաքականության մեջ, արվեստում, թե սպորտում մակարդակի, կլասի տարբերությունը պարզ է դառնում առաջին, նույնիսկ ամենաանփորձ, հայացքից։ Ավելացնենք նաեւ, որ Մաքնիլին բավականին մեծ գումար կստանա պարտության համար։
