Հոկտեմբերի 27-ին հրապարակվել է ԼՂ կառավարության որոշումը հանրապետությունում գյուղատնտեսական մշակաբույսերի պետական սորտափորձարկման համակարգի ստեղծման եւ գործող սորտափորձարկման տեղամասերի կարգավիճակի մասին: Տեղի մասնագետները շատ են կարեւորում այս որոշումը, գտնելով, որ պետության ուշադրության կենտրոնում է հայտնվում Արցախի համար այնպիսի մի կարեւոր ճյուղ, ինչպիսին է սերմնաբուծությունը:
Այս օրերին Արցախում են գտնվում ՀՀ ժողկրթության մի խումբ մասնագետներ՝ ՀՀ գիտության եւ կրթության փոխնախարար Աշոտ Բլեյանի գլխավորությամբ: Հանրապետության շրջաններում մանկավարժական կոլեկտիվներին ու համապատասխան մասնագետների հետ հանդիպումից հետո, հոկտեմբերի 27-ին Ստեփանակերտի վարչակազմի շենքում հյուրերի, ինչպես նաեւ մայրաքաղաքի ու Շուշիի շրջանի հանրակրթական դպրոցների տնօրենների եւ ուսմասվարների մասնակցությամբ տեղի ունեցավ սեմինար-խորհրդակցություն: Ինչպես ընդգծվեց խորհրդակցությունում, փորձի ամենամյա փոխանակումներ կատարելը երկուստեք փոխշահավետ է: Քննարկվել են նաեւ ԼՂՀ ժողկրթության ասպարեզում առկա մի շարք հիմնահարցեր: Խորհրդակցությանը մասնակցել է ԼՂՀ ժողկրթության, գիտության, մշակույթի եւ սպորտի նախարար Հենրիկ Գրիգորյանը:
Գ. ԲԱՂԴԱՍԱՐՅԱՆ
Ստեփանակերտ
