Լուծարվել է երկարատեւ եւ ծանր հոգեվարք ապրող Սունդուկյանի անվան թատրոնը։
Երկարատեւ եւ ծանր հոգեվարք ապրող, Մայր կոչվող թատրոնի գեղարվեստական ղեկավար է նշանակվել Վահե Շահվերդյանը։
Կարճ տեղեկանք.
Վահե Շահվերդյան՝ Ազգային ժողովի պատգամավոր, Երեւանի թատերական ինստիտուտի (նույնպես երկարատեւ եւ ծանր հոգեվարք ապրող) ռեկտոր, Վանաձորի Հովհ. Աբելյանի անվան թատրոնի գեղարվեստական ղեկավար։
Կարդացեք նաև
Հետեւություն.
Դժվարությամբ, ցավագին դժվարությամբ, սակայն ուզած-չուզած, հայ արվեստն ու հայ Արվեստագետը արդեն հաշտվել են այն «անքննելի իրողության» հետ, որ Հայաստանից մինչեւ Հնդստան, Արցախից մինչեւ Չինումաչին, ընդամենը մի հայ քանդակագործ կա Լեւոն Թոքմաջյան անունով (կա՝ ինքն է, չկա՝ էլի ինքն է), որ մեր սեւ երեսը սպիտակ է անում աշխարհի ու սերունդների առաջ։
Մենք հաշտարար ժողովուրդ ենք, եւ վստահ եմ, որ կհաշտվենք նաեւ այն իրողության հետ, որ նույն Հայաստանից մինչեւ նույն Հնդստան, նույն Արցախից մինչեւ նույն Չինումաչին մեկ թատերական գործիչ ունենք՝ Վահե Շահվերդյան անունով։ Կհաշտվենք։ Եթե Վահե Շահվերդյանը, հանուն հայ թատրոնի վերածննդի եւ հայոց պետության կայացման այդքան բեռ է առնում իր ուսերին, սովորական մահկանացուներս ինչ իրավունք եւ համարձակություն ունենք կասկածելու, որ տվյալ դեպքում գործ ունենք գերմարդու հետ։
Ոչ իրավունք ունենք եւ ոչ էլ համարձակություն։ Տվյալ դեպքում։
Լիզա ՃԱՂԱՐՅԱՆ