Ըստ ՀՀ նախագահի աշխատակազմին մոտ կանգնած աղբյուրներից «Առավոտ» հասած տեղեկությունների, հոկտեմբերի 9-ի առավոտյան հանրապետության նախագահ Ռոբերտ Քոչարյանը պետք է հանդիպեր «Երկրապահ» եւ «Բարեփոխումներ» խմբերի ղեկավարների հետ, սակայն հանդիպումը չի կայացել։ Այն հետաձգվել է «Երկրապահ» պատգամավորական խմբի նախագահ Սմբատ Այվազյանի հիվանդության պատճառով։
ՎԻՃԱԿԱԳՐՈՒԹՅԱՆ ԱՐԴՅՈՒՆՔՆԵՐԸ
Ազգային ժողովում դեռեւս լրջորեն քննարկվում են սեփականաշնորհման ծրագրում փոփոխություններ կատարելու հարցով անցկացված քվեարկության արդյունքները։ «Հանրապետություն» միավորումից 12-ը բացակայել է, 2-ը չի քվեարկել, 3-ը մնացել է ձեռնպահ։ 2 չքվեարկած ունի «Հայրենիքը», 4-ը՝ «Շամիրամը», 1-ը՝ ԻՄ-ը։ ԻՄ-ի մյուս անդամը, ինչպես նաեւ 2-ական շամիրամական ու ԱԺՄ-ական բացակայում էին։ «Երկրապահի» տվյալներն են՝ 11 կողմ, 5 ձեռնպահ, 31 դեմ։ Չի քվեարկել 18 երկրապահ, բացակայել է 14-ը։
ԵՎՍ ՄԵԿ ԻՐԱՎԱՊԱՇՏՊԱՆ ՀԵՌԱՑԱՎ ՀՅԴ-ԻՑ
Կարդացեք նաև
Արդեն հայտնել ենք, որ «Ավանգարդ» հումանիտար հետազոտությունների կենտրոնի ներկայացուցիչ Հովհաննես Ասրյանը ՀՅԴ-ից դուրս գալու դիմում է գրել։ Մեզ հայտնի դարձավ, որ նույն քայլը կատարել է նաեւ «Ավանգարդ» կենտրոնի նախագահ Էդվարդ Մամիկոնյանը։ «ՀՅԴ-ն կասեցումից դուրս եկավ, եւ ես կարող եմ արդեն ազատվել կուսակցական կապանքներից,- դրդապատճառների մասին մեր հարցին ի պատասխան ասաց պրն Մամիկոնյանը։ – Մարդու իրավունքների պաշտպանությանն ուղղված գործունեությունը կապ չի կարող ունենալ կուսակցականության հետ, եւ մեկը մյուսին կարող է խանգարել»։
