Լրատվամիջոցներն արդեն հաղորդել են Երեւանի առեւտրաիրավագիտական տեխնիկումի տնօրեն Գերման Վարդապետյանի սպանության մասին։ «Առավոտին» հաջողվեց պարզել, որ նա Վազգեն Սարգսյանի թիկնապահ Վարդան Վարդապետյանի հայրն էր։ Եվ գուցե նաեւ այս հանգամանքով էր պայմանավորված, որ ռազմական ոստիկանությունն ընդամենը մեկ օրում բացահայտեց սպանությունը։ Գերման Վարդապետյանին խեղդամահ արած 4 «ռեկետյորներից» երեքը ՆԳ եւ ԱԱ նախարարության նախկին աշխատակիցներ են՝ մեկը Կոշի գաղութի պետի պաշտոնակատարն էր, իսկ մարդասպաններից մեկը՝ Սերգեյ Մկրտչյանը (Քինգ մականունով), «Ալֆա» ջոկատի անդամ էր։ Նշենք նաեւ, որ հանցագործներից մեկն ինքն էր ռազմական ոստիկանության աշխատակիցներին ցույց տվել դիակի տեղը, որից հետո նոր գործը հանձնվել է այլ իրավապահ մարմիններին։
ՆԱԽ ԲՈՒԴԱՊԵՇՏ, ՀԵՏՈ ՓԱՐԻԶ
Նոր անորոշ նախաձեռնություն է ցուցաբերել Եվրախորհրդի խորհրդարանական վեհաժողովի քաղաքական հարցերի հանձնաժողովը։ Հայկական պատվիրակության անդամներին օրերս տեղյակ է պահվել, թե Ղարաբաղի հարցով քաղաքական հանձնաժողովը լսումներ անցկացնելու մի նոր նախաձեռնություն է ցուցաբերում՝ մինչեւ փարիզյան հանդիպումը։ Նոյեմբերի 26-ին լսումներ տեղի կունենան Բուդապեշտում։ Այս մի միջոցառման մասին նախնական որեւէ պայմանավորվածություն չի եղել։
