ԲԱՑ ԹՈՂԵՔ ՄԵՐ ՋՈՒՐԸ Արագածոտնի մարզի Օհանավան գյուղի բնակիչները, անկախ սեռական պատկանելությունից եւ տարիքից, երեկ փակել էին Ապարան-Երեւան մայրուղին։ Ականատեսի վկայությամբ, երեխաները պառկել էին մայրուղու լայնությամբ, քանի որ ահագնացող արտագաղթը թույլ չի տալիս սույն գործողությունն իրականացնել ճանապարհի երկարությամբ։ Կենդանի պատնեշի պատճառը Օհանավանի չորացող խնձորի այգիներն են, որոնց չորացմանը «նպաստում է» ապարանցիների անսահման սերը ուրիշների ոռոգման ջուրը յուրացնելու նկատմամբ։ ԱՐՏԱԳԱՂԹԸ՝ ՊԵՏԱԿԱՆՈՐԵ՞Ն ԱԺ պատգամավոր, կոմունիստ Խորեն Սարգսյանը «Առավոտին» հայտնեց, որ անցած շաբաթ օրը Արտաշատի ավտոմայրուղուց երեք ավտոբուսներ, յուրաքանչյուրում՝ 60-ական ՀՀ քաղաքացի, ուղեւորվել են Ուկրաինա։ Ավտոբուսների ուղեւորներին ուղեկցողները թողել են ուկրաինական անտառներում եւ հեռացել։ Խորեն Թռչունիչի պնդմամբ՝ Հայաստանում միտումնավոր արտագաղթ է կազմակերպվում ամենաբարձր պետական մակարդակով։ Մարդկանց տրվում են փախստականի կարգավիճակը հաստատող փաստաթղթեր, կեղծ ամուսնության վկայականներ (Թռչունիչի ասելով, դրանցում գրվում է միայն կնոջ անուն-ազգանունը)։ Իբրեւ թե մարդկանց ուղեկցողների մեջ եղել են ՆԳ եւ արդարադատության համակարգի աշխատակիցներ։ ՀԺԿ-Ի ԿՈՂՔԸ ԴԱՏԱՐԿ ՉԷ՞ «ՀԺԿ-ի կողքին մեծ քաղաքական ուժեր կան ե՛ւ խորհրդարանում, ե՛ւ խորհրդարանից դուրս»,- «Ազատություն» ռ/կ-ին ասել է ՀԺԿ-ի անդամ, ԱԺ պատգամավոր Էմմա Խուդաբաշյանը։
