Եթե հաշվի առնենք, թե Ռոբերտ Քոչարյանն ինչպես է կատարում իր նախընտրական խոստումները, կարելի՞ է հավատ ընծայել, որ կիրականացվեն միջնաժամկետ նոր խոստումները 40-45 հազար աշխատատեղերի մասին, «Առավոտի» այս հարցին ի պատասխան կոմունիստ պատգամավոր Խորեն Սարգսյանն ասաց. «Նման խոսք կա, երբ մեկը երազ է պատմում, ասում են՝ «Վրադ բաց ես քնել»։ Սա նման է դրան։ Չի՛ կատարվելու։ Լուսադեմի երազ է»։
ՊԱՏԿԵՐԱԶԱՐԴ ՑՈՒՅՑ
Երեկ ԱԺ ընդունարանում յուրօրինակ նստացույց էր ձեռնարկվել, որի մասնակիցները դարձյալ բողոքում էին հսկիչ-դրամարկղային մեքենաների դեմ։ Նրանց մի կարգախոսի վրա նկարված ՀԴՄ-ի վրա գրված էր «զիբիլ», եւ նշված. «Ով հայ ժողովուրդ, քո միակ փրկությունը այս զիբիլն է»։ Մեկ այլ կարգախոսի վրա նկարված ՀԴՄ-ն բնորոշված էր որպես «բոբո», եւ գրված. «ՀԴՄ-ները կերան մարդկանց եւ աշխատատեղերը»։ ՀԴՄ հապավումը բացված էր՝ «Հայաստանը դատարկողների մաֆիա»։ Իսկ մի կարգախոս բանաստեղծական էր. «Նախագահ-նախագահ՝ հաց ենք ուզում։ Նախագահ-նախագահ՝ հաց տուր մեզ»։ Եվ վերջապես, մի կարգախոսում պարտադիր էր համարվում ՀԴՄ-ներ տեղադրել միայն իշխանավորների գրպաններին։
Կարդացեք նաև
ՆԱ ՆԱԻՎ ՉԷ
Փաստաբանների միջազգային միության նախագահ Տիգրան Ջանոյանը վերջերս Մոսկվայից մեկնել էր այլ երկիր (ըստ լուրերի՝ Եգիպտոս), որտեղ եւ, ասեկոսեների համաձայն, հանդիպել էր Վանո Սիրադեղյանին։ Պրն Ջանոյանն «Ազատություն» ռադիոկայանին այս առնչությամբ ասել է, որ ինչպես եւ իր մյուս պաշտպանյալները՝ Սիրադեղյանը եւս իր նկատմամբ մեծ վստահություն ունի, բայց նրա անհետանալուց հետո որեւէ շփում չեն ունեցել. «Չեմ կարծում, որ Սիրադեղյանն այդ աստիճանի նաիվ մարդ է, որ հանդիպումներ նշանակի»։
ՀԱՅԿԱԿԱՆ ԱՌԱՋԻՆ ԱՄԵՆՕՐՅԱ ԷԼԵԿՏՐՈՆԱՅԻՆ ԹԵՐԹԸ
Նոյեմբերի 8-ից «Չորրորդ իշխանությունը», որի խիստ սուր ընդդիմադիր ուղղվածության պատճառով որեւէ հովանավոր վախեցավ մոտ գալ թերթին, լույս է տեսնելու միայն էլեկտրոնային տարբերակով։ «Ինտերնետում» նախկին շաբաթաթերթ «Չորրորդ իշխանությունը» փոխելու է իր պարբերականությունը՝ ամեն օր փոխելով իր էջի նյութերը։
