«Ընտրվածների մասին վատ խոսելն անբարոյականություն է» Այսպես է կարծում ՀՀ ԳԱԱ նախագահ Ֆադեյ Սարգսյանը, մանավանդ, որ համոզված է՝ ԳԱԱ թղթակից-անդամների ընտրություններն անցել են շատ արդար եւ ընտրվել են արժանավորները։ Ֆադեյ Տաճատիչն ափսոսում է, որ շատ արժանավորներ էլ դուրս են մնացել, սակայն հատկացված տեղերը 24-ն էին, իսկ հավակնորդները՝ 179։ Թղթակից-անդամների ինստիտուտը վերացվել էր 1993-ին եւ վերականգնվել է երկու տարի առաջ։ Ըստ ԳԱԱ նախագահի՝ «թղթակից-անդամներ պետք է լինեն, Ակադեմիան չի կարող լինել առանց թղթակից-անդամների»։ Թղթակից-անդամներին ներկայացվող պահանջները «ավելի մեղմ են», քան ակադեմիկոսներինը։ Ու քանի որ միանգամից ակադեմիկոս դառնալը շատ դժվար է, թեեւ այդպես էլ է պատահում, նախ դառնում են թղթակից-անդամ, հետո, երբ գիտական դպրոց կստեղծեն, կարժանանան նաեւ ակադեմիկոս դառնալու պատվին։ Ընտրված թղթակից-անդամների մասին Ֆադեյ Տաճատիչը բարձր կարծիքի է, այդ թվում՝ Լեոնիդ Հակոբյանի, որին համարում է շատ լավ տնտեսագետ եւ նույնիսկ առաջարկել է վերադառնալ ԳԱԱ։ Պրն Հակոբյանի թեկնածությունը հետաքրքիր էր այնքանով, որ հենց գիտական շրջանակներից մամուլում կարծիք էին հայտնել, թե նա չի համապատասխանում թղթակից-անդամներին ներկայացվող պահանջներին։ Ի պատասխան մեր հարցի՝ թեկնածուներից քանի՞սն էին գիտական աշխատանքով զբաղվող գիտնականներ, Ֆադեյ Սարգսյանն ասաց՝ բոլորը, այլապես գրանցվելու իրավունք չէին ունենա։ Բայց դժվարացավ ասել, թե գիտական ինչ աշխատանքով է հիմա զբաղվում Լեոնիդ Հակոբյանը, թեպետ վստահ է, որ հնարավոր է եւ պետական պաշտոն զբաղեցնել, եւ գիտությամբ զբաղվել։ Ի դեպ, առաջադրվել էին նաեւ ԳԱԱ ինստիտուտների տնօրեններ, որոնցից 5-ն արժանացել է թղթակից-անդամի կոչման, իսկ 7-ը՝ ոչ։ Ֆադեյ Տաճատիչը մանրամասն ներկայացրեց թղթակից-անդամների ընտրության բազմափուլ մեխանիզմը։ Թեկնածուներին առաջադրում են գիտական հիմնարկների գիտական խորհուրդները՝ արժանավորներին որոշելով փակ գաղտնի քվեարկությամբ։ ԳԱԱ հանձնաժողովը ստուգում է ներկայացված փաստաթղթերի համապատասխանությունը օրենսդրությանը եւ ներկայացնում բաժանմունքների գիտական խորհուրդների քննարկմանը։ Մոտ մեկ ամսվա ուսումնասիրությունից հետո այդ խորհուրդների ղեկավարները դեկտեմբերի 6-ին բաժանմունքների ընդհանուր ժողովի ժամանակ զեկուցել են, թե փակ գաղտնի քվեարկությամբ ով ինչքան միավոր է հավաքել եւ նաեւ ներկայացրել են դրսից ստացած կարծիքները։ Այս փուլի հաղթողները ներկայացվել են ԳԱԱ ընդհանուր ժողովին եւ Հայաստանի 84 (93-ից այդքանն է մասնակցել) ակադեմիկոսները որոշել են թղթակից-անդամների անունները։ Ըստ Ֆադեյ Տաճատիչի, ամեն ինչ արվել է հրապարակային։ Թերթում տրվել էր հայտարարություն եւ ցանկացած ոք կարող էր իր կարծիքը հայտնել այս կամ այն թեկնածուի եւ նրա աշխատանքի մասին։ Ի դեպ, մեր զրույցին մասնակցող ակադեմիկոս Սերգեյ Համբարձումյանը հենց այս հանգամանքը շեշտեց։ Ըստ նրա, այսօր ոչ ոք իրավունք չունի կասկածել, որ ինչ-որ մեկը, այդ թվում Լեոնիդ Հակոբյանը, արժանի չէ թղթակից-անդամի կոչումին, քանի որ կասկածողները մոտ մեկ ամիս հնարավորություն ունեին իրենց տեսակետը գրավոր հայտնել, սակայն ոչ ոք պրն Հակոբյանի հասցեին բացասական կարծիք չի ուղարկել։ ՆԱԻՐԱ ՀՈՎՀԱՆՆԻՍՅԱՆ
