«ԱԶԱՏՈՒԹՅՈՒՆ» ԿՈՒՍԱԿՑՈՒԹՅԱՆ ՀԱՅՏԱՐԱՐՈՒԹՅՈՒՆԸ «Ազատություն» կուսակցությունը խիստ մտահոգված է Հայաստանում հաստատված իրավիճակով։ Քաղաքական դասավորությունները թույլ չեն տալիս ազատական ուղղվածություն ունեցող ուժերին մասնակցություն ունենալ երկրում տեղի ունեցող զարգացումներին, իսկ դրությունը գնալով ավելի ծանրանում է, եւ անցած երեք տարին բավական է արդեն դիտարկելու, որ այն օրինաչափության է վերածվում։ Երկրի ղեկը փաստորեն ամբողջովին մնացել է «ազգայնականների» ձեռքում, որոնք մտածում եւ գործում են ժամանակի անհրաժեշտություններին հակոտնյա, իսկ տնտեսական ոլորտում զուրկ են էական ծրագրերից։ Հանրությանը խոսք է տրվում բարելավել կենսամակարդակը, աշխատեցնել արդյունաբերությունը, թեթեւացնել գյուղացու վիճակը, վարել համաշխարհային ազգին վայել արտաքին քաղաքականություն։ Այս պոպուլիզմն ավարտվեց նրանով, որ վերջին երեք տարիներին իրական կենսամակարդակն իջել է շուրջ 40 տոկոսով։ Ներկա իրավիճակում անհրաժեշտ են վճռական գործողություններ՝ պետականությունը փրկելու համար։ Հավանաբար, դա գիտակցում են եւ իշխանությունները, սակայն, դատելով նրանց կողմից կատարվող կցկտուր քայլերից, հարցականի տակ է իրական փոփոխություններ կատարելու նրանց կարողությունը։ «Ազատություն» կուսակցությունն ունի մանրամասն մշակումներ օրենսդրական, դատական, ներքին եւ արտաքին քաղաքականության, տնտեսության, հարկային, բանկային, էներգետիկ, կրթական, գիտամշակութային եւ հասարակական-պետական կյանքի մյուս ոլորտներում բարեփոխումների արգելակումը կանխելու եւ կրկին զարգացման ուղի դուրս գալու համար։ Հ. Գ. Հայտարարությունը ներկայացնում ենք կրճատումներով։