ԱՐԴՅՈՒՆՔ ՉԻ ԼԻՆԵԼՈՒ «Առավոտն» առանձին փորձեց պարզել նախկին իշխանությունների հետ ՀՅԴ Բյուրոյի անդամների շփումների մանրամասները։ Պարոն Նալբանդյանը նախ պատմեց 1997-ի օգոստոսին Ամստերդամում կայացած այն հանդիպման մասին, որին ինքը մասնակցել էր. «Մենք մշակեցինք մի սեմինար Հայաստանի արտաքին գործերի նախարարության հետ, որը գլխավորում էր պրն Ալեքսանդր Արզումանյանը։ Հաջող սեմինար էր, ուր կարողացանք երկուստեք շարադրել արտաքին քաղաքականությանն առնչվող մեր տեսությունները եւ փորձել համադրել ապագայի մեր ծրագրերը»։ Այն պնդումների առնչությամբ, թե իշխանափոխությամբ ուղղակի արագացվեց Դաշնակցության՝ կասեցումից դուրս գալու հարցը, որն արդեն իսկ գրեթե լուծվել էր իշխանությունների եւ ՀՅԴ ներկայացուցիչների բանակցությունների միջոցով՝ Մարիո Նալբանդյանն ասաց. «1997-ի ապրիլին Երեւանում ՀՅԴ Բյուրոյի եւ Հայաստանի կառավարության ներկայացուցիչների բանակցություններն արդյունքի չհասան։ Վերջապես քաղաքական ուժերի եւ կառավարության միջեւ որեւէ մեկ բանակցություն միշտ ողջունելի է։ Բայց ես չեմ կարծում, որ այդ բանակցություններն ունենալու էին այն վախճանը, որ ասվում է։ Անմիջական հաջողությամբ չպիտի պսակվեին։ Գոնե դրա նշանները չկային»։ Ա. Ի.
