ՀԱԿ՝ ԱՌԱՆՑ ԱԶԱՏՈՒԹՅԱՆ Քանի որ ՀՌԱԿ-ը, ՌԱԿ-ը ծանոթ անվանումներ են եւ մասնավորապես «ազատություն» բառի հապավում, թվում է, ՀԱԿ անվանումն էլ պետք է ինչ-որ առնչություն ունենա ազատությանը։ Համենայն դեպս, «ազատությունը» մոդայիկ բաղադրիչ է կուսակցությունների անվանումներում։ Այնինչ ՀԱԿ-ը Հայաստանի ագրարային կուսակցության կրճատ անվանումն է, որը ելնելով Քաղաքացիական օրենսգրքի պահանջներից եւ վերագրանցման սահմանված վերջնաժամկետից, հունիսի 1-ին գումարել էր արտահերթ համագումար՝ կանոնադրական եւ ծրագրային անհրաժեշտ փոփոխություններ կատարելու համար։ Պարզվում է, այդ կուսակցությունը հիմնադրվել է 1992-ին եւ նույնիսկ պնդողներ կային, թե մասնակցել է 95-ի խորհրդարանական ընտրություններին, իբր կուսակցության նախկին անվանումը՝ ՀԱԺԿ, ընդգրկված է եղել քվեաթերթիկներում։ Ինչեւէ, մինչ այժմ այդ կուսակցության անվանումը եւ գործունեությունը անհայտության այնպիսի մշուշով են սքողված եղել, որ դժվար է ինչ-որ հանգամանք մտաբերել, առավել եւս պնդել։ Նույնքան դժվար է նաեւ հասկանալ, թե ինչո՞ւ կուսակցություն եւ ոչ ասենք՝ հասարակական միություն, չէ՞ որ ՀԱԿ-ի անդամները ներուժ ունեն (130 պատվիրակներից 19-ը ներկայացնում էին գիտակրթական ոլորտը, նրանց թվում՝ գիտության 7 թեկնածուներ) եւ փոքրիշատե ուշագրավ ծրագրեր են կազմել (հանրապետության պարենային ապահովվածություն, գյուղատնտեսական աշխատանքների կոոպերացում, վերամշակող ոլորտի հզորացում, ներմուծում-արտահանումների հավասարակշռում եւ այլն) հատկապես ագրարային ոլորտում։ Գուցե Հայաստանի ակունք-կուսակցությունները եվրոպականացվում են եւ ձեռք բերում պրոֆիլային ուղղվածություն։ Կամ գուցե ագրոոլորտում ընդօրինակում են ԱՊՀ երկրների իրենց գործընկերներին, որոնցից ոմանք նույնիսկ խորհրդարանում պատգամավոր ունեն։ Սեփ. լր.
