ԳՆԱ ՄԵՌԻ ՈՒ ՄԵՌԻ «Քաղաքապետարանի բնակչության հատուկ սպասարկում» ՊՓԲԸ-ից տեղեկացանք, որ Երեւանում կա 17 գերեզման եւ 3 պանթեոն (որտեղ հուղարկավորում են անվանի մարդկանց)։ Պանթեոններից մեկը բոլորին հայտնի Կոմիտասի այգում է, մյուսը՝ Թոխմախ գյոլում, երրորդը՝ Նուբարաշենում։ Ի տարբերություն նախորդ երկուսի, շատ ծանր է Նուբարաշենի գերեզմանատան վիճակը։ Սողացող հողի հետեւանքով հինգ-վեց տարի առաջ հուղարկավորված դիերը հողի հետ այս ու այն կողմ «երթեւեկելով»՝ իրար են խառնվում եւ անհասկանալի է դառնում, թե որը ում գերեզմանն է։ Սողհոսքի պատճառով քարուքանդ են եղել տապանաքարերը, անվանաքարերը եւ պանթեոնի հուշարձանները։ «Քաղաքապետարանի բնակչության հատուկ սպասարկում ՊՓԲԸ տնօրեն Գառնիկ Աղաջանյանն ասաց, որ վերջերս հետազոտումներ են անցկացվել եւ պարզել են, որ Նուբարաշենի գերեզմանատան մի մասը սողացող հող չէ, սակայն հիմնական զանգվածը, ինչպես նաեւ պանթեոնը՝ անմխիթար վիճակում են։ Ըստ Գ. Աղաջանյանի. «Այդ հատվածում որեւէ վերականգնողական աշխատանք կատարելը անիմաստ է, քանի որ հիմքը սողացող է։ Եթե նույնիսկ փորձենք ուղղել, միեւնույն է, որոշ ժամանակ անց նույն պատկերն է ստացվելու»։ Ըստ Գ. Աղաջանյանի, Նուբարաշենում նոր հողաբաժանում չի կատարվում, սակայն հուղարկավորությունները շարունակվում են, «մենք իրավունք չունենք մարդուն թույլ չտալ իր մտերիմին հարազատի մոտ հուղարկավորելու»։ Գ. Աղաջանյանն ասաց, որ նրանք, ովքեր ցանկանում են իրենց հարազատների աճյունները տեղափոխել այլ գերեզմանատուն, «պետք է մեզ դիմում ներկայացնեն եւ վճարեն 19 հազար դրամ, այս գումարը փոս փորելու եւ տեղափոխելու արժեքն է»։ Պանթեոնի խնդիրը անլուծելի է, քանի որ պանթեոններում հուղարկավորում կատարելը կամ մեկից մյուսը տեղափոխելու իրավունքը վերապահված է կառավարությանը։ Այսինքն՝ ստացվում է այնպես, որ կառավարությունը արհամարհում է մեր մտավորականներին, քանի որ, ըստ Գ. Աղաջանյանի, «դեռեւս ոչ վերականգնելու, ոչ էլ տեղափոխելու թույլտվություն չի տալիս»։ Գ. Աղաջանյանից նաեւ տեղեկացանք, որ Դավիթ Բեկի փողոցի հարեւանությամբ նոր պանթեոնի կառուցում է պլանավորվում, որը նախատեսվում է 10 տարվա համար։ Ն. Մ.
