Ի ՊԱՇՏՊԱՆՈՒԹՅՈՒՆ ԱՆԿԱԽ ԼՐԱՏՎԱՄԻՋՈՑՆԵՐԻ Այսօր պետությունը տեր չի կանգնում ժողովրդավարական արժեքներին, եւ ուրեմն պետք է ժողովուրդը հոգա անկախության տարիներին ձեռք բերած ամենալուրջ արժեքի՝ ազատ խոսքի մասին: Ազատ մամուլի անկախությունն ու ազատությունը լիարժեք ապահովելու համար ստեղծվել է «Խոսքի ազատության աջակցության հիմնադրամ»: Հիմնադրամի նպատակն է պաշտպանել առանց այն էլ քիչ մնացած անկախ լրատվամիջոցներին: Հիմնադրամի գործադիր տնօրենն է իրավապաշտպան Վարդան Հարությունյանը: Հոգաբարձուների խորհրդի նախագահը՝ «Տարեգիր» էլեկտրոնային օրաթերթի գլխավոր խմբագիր Վասակ Դարբինյանը, անդամներ՝ «Ա1+» հ/ը նախագահ Մեսրոպ Մովսեսյանը, «Առավոտ» օրաթերթի գլխ. խմբագիր Արամ Աբրահամյանը, «Հայկական ժամանակ» օրաթերթի գլխ.խմբագիր Նիկոլ Փաշինյանը, փաստաբան Տիգրան Տեր-Եսայանը, «Հետաքննող լրագրողների ասոցիացիայի» նախագահ Էդիկ Բաղդասարյանը, Մամուլի ազգային ակումբի նախագահ Նարինե Մկրտչյանը եւ նախկին քաղբանտարկյալ Ազատ Արշակյանը: «Այբ-Ֆե» Այս հիմնադրամի միջոցներն առաջին հերթին տրամադրվելու են «Ա1+»-ին եւ «Նոյյան Տապանին», որոնց աշխատակազմը պետական մարմինների միջամտությամբ՝ մասամբ զրկվեց գործելու հնարավորությունից։ Հետագայում հիմնադրամի միջոցները կտրամադրվեն այլ լրատվամիջոցների եւս, որոնք կունենան աջակցության կարիք։ Կոչ ենք անում բոլոր նրանց, ում համար թանկ է խոսքի ազատությունը եւ կարեւոր, որ վերոհիշյալ հեռուստաընկերությունները մինչեւ իրենց համար դժվարին այս ժամանակների հաղթահարումը պահպանեն իրենց աշխատակազմը՝ թեկուզ համեստ լումա ներդնեն այս հիմնադրամում։
