Փոխե՛նք մեր ոճը Թերեւս ՀՅԴ Բյուրոյի անդամ Վահան Հովհաննիսյանը նախօրեին բավական բուռն էր նշել ԱԺ փոխնախագահի պաշտոնում ընտրվելը, ուստի խորհրդարանական թղթակիցների հետ հարցազրույցն ուղեկցվում էր նման արտահայտություններով՝ «ցավներդ տանեմ», «քաղցրեր», «սիրելիներ»: Ուշագրավ է, որ նման որակումներ նա չէր խնայում անգամ այն թերթերի լրագրողների համար, որոնց այլ պարագաներում անգամ հարցազրույց չի տալիս: Կամ էլ՝ գուցե նոր պաշտոնի անցնելուց հետո նա մի քիչ ավելի լայնախո՞հ է դարձել: Բավական ազատ այս զրույցի ընթացքում պրն Հովհաննիսյանը նաեւ անկեղծ նկատառումներ հայտնեց վերջին օրերի անցուդարձի առնչությամբ: Պատասխանելով «Ազատություն» ռ/կ-ի հարցին, թե ինչո՞ւ էր տարածքային կառավարման նախարարը հետեւում քվեարկության արդյունքների հաշվարկի գործընթացին՝ ԱԺ փոխնախագահը մասնավորապես ասաց. «Քաղաքական կոալիցիայի համակարգի մեջ քվեարկելը մի քիչ այլ սկզբունքներ է ենթադրում, քան պարզ՝ բաց քվեարկությունը… Այստեղ պայմանավորվածություն կա, որը պետք է կատարել: Եթե պայմանավորվածությունը չեն կատարում, ուրեմն կոալիցիան չի կայացել: Բնական է, որ նույն Հովիկ Աբրահամյանը եւ ես շահագրգռված ենք, որ կոալիցիան անցնի առաջին փորձությունը: Պետք չի զարմանալ, որ այդ շահագրգռվածությունը մեկն արտահայտում է սառնասիրտ դեմքով, մյուսն, ասենք՝ արկղի կողքով քայլելով»: Լրագրողը հետաքրքրվեց՝ «այսինքն, պրն Աբրահամյանին ընդունենք որպես կառավարության կողմից դիտո՞րդ», սակայն պրն Հովհաննիսյանն ընդվզեց. «Պետք չի՛: Ինքը դիտորդ չի՛: Ինքը դիտորդական առաքելություն չի իրականացնում»: «ՆՏ»-ի հարցն էր, թե երբ է լինելու, որ պաշտոնների նշանակվեն այդ ոլորտին իրազեկ արհեստավարժները: Վահան Հովհաննիսյանը հիշեցրեց, որ ըստ օրենքի՝ նախարարը պետք է քաղաքական դեմք լինի. «Եվ բոլորովին պարտադիր չի, որ, օրինակ, տրանսպորտի նախարարը ժամանակին տաքսու «շոֆեռ» եղած լինի»: Նկատեց, թե արհեստավարժությունը պարտադիր պայման չէ. «Ի վերջո, այդ դեպքում արհեստավարժին ո՞վ է որոշում: Ես օրինակ, կարող եմ ասել, որ այս կամ այն ասպարեզում 10 արհեստավարժից 9-ը ապուշ են: Կամ 10-ը»: «ՀԺ» թղթակիցը հետաքրքրվեց, թե նա վստա՞հ է, որ ՀՀԿ-ի եւ «Օրինաց երկրի» հետ իրենց քաղաքական կոալիցիան կունենա երկար կյանք: Ի պատասխան՝ Վահան Հովհաննիսյանը թախծոտ ու մտախոհ ասաց. «Գիտեք ինչ, օրինակ եթե էս փողոցի «տռամվի» գծերը չհանեին՝ ես վստահ չէի լինի, որ մենք դուրս գալուց չէինք ընկնի տռամվայի տակ: Ուրեմն՝ վստահ կարելի է լինել միայն սեփական ուժերի վրա»: Խռովեց նույն թերթի թղթակցի՝ կոալիցիայի հասցեին «աջաբսանդալ» որակումից. «Անընդհա՜տ այ սենց փիս խոսքեր է ասում»: Լրագրողները նկատել էին, որ այ ս ԱԺ-ի մեծահարուստների համար նորաձեւ են թանկարժեք, բայց բավական անճաշակ մուգ գծավոր կոստյումները: ԱԺ փոխնախագահն այս առնչությամբ էլ նկատառումներ ուներ. «Եթե գծավոր է կոստյումը՝ միաժամանակ գծավոր վերնաշապիկը ճիշտ չի: Նաեւ ասեմ, որ կոստյումի հետ սպիտակ «նասկի» հագնելն էլ ճիշտ չի»: Նշենք, որ Երեւանում պատգամավոր ընտրվածներից մեկը հենց այդպես էլ հագնվում է: Ինչ վերաբերում է իրեն՝ պրն Հովհաննիսյանին. «Ես ճիշտ եմ հագնվում: Ինձ մամաս սովորեցրել է»: Ա. ԻՍՐԱՅԵԼՅԱՆ
