ԱՆՎԵՐԱՑՆԵԼԻ ՕՐԻՆԱԽԱԽՏՈՒՄ «Հեռուստատեսության եւ ռադիոյի մասին» օրենքի համաձայն՝ օտարերկրյա հեռուստաընկերությունների հաղորդումները Հայաստանում կարող են ամբողջությամբ վերահեռարձակվել միջպետական պայմանագրի կամ Ազգային հանձնաժողովի կողմից վերահեռարձակողին տրված արտոնագրի հիման վրա՝ օգտագործելով առկա հեռուստահաճախությունների 1/5-ից ոչ ավելին՝ յուրաքանչյուր ընդգրկույթի համար: Մետրային ընդգրկույթում օրենքի այս դրույթն ակնհայտորեն խախտված է, քանի որ 6 կապուղիներից 2-ը տրամադրված են ռուսական OPT եւ PTP հեռուստաալիքների վերահեռարձակմանը: Մեր հարցին, թե ՀՌԱՀ-ն ինչո՞ւ միջոցներ չի ձեռնարկում այս օրինախախտումը վերացնելու ուղղությամբ՝ Ազգային հանձնաժողովի նախագահ Գրիգոր Ամալյանը պատասխանեց. «Եթե ծանոթանաք ժամանակագրական պատկերին՝ կհամոզվեք, որ այստեղ չի եղել օրենքի որեւէ խախտում: Խնդիրը հետեւյալն է՝ վերահեռարձակման համար կիրառելի ալիքների 1/5-ի մասով օրենքի փոփոխությունը եղել է շատ ավելի ուշ, քան կնքվել են միջպետական պայմանագրերը եւ մետրային տիրույթում գործել են հեռարձակվող օտարերկրյա հեռուստաընկերությունները»: Իրոք՝ օրենքի այդ փոփոխությունն ընդունվել է 2001-ի նոյեմբերին, իսկ մինչ այդ՝ 2000-ի հոկտեմբերից, երբ ընդունվեց «Հեռուստատեսության եւ ռադիոյի մասին» օրենքը, ուժի մեջ է եղել մեկ այլ դրույթ, ըստ որի՝ օտարերկրյա հեռուստաընկերությունների հաղորդումները Հայաստանում կարող են «ամբողջությամբ հեռարձակվել միջպետական պայմանագրերի հիման վրա՝ օգտագործելով առկա հեռուստահաճախությունների 1/3-ից ոչ ավելին»: Գրիգոր Ամալյանը նկարագրեց իրավիճակը. «Պետությունը կնքել է միջպետական պայմանագրեր՝ մնալով օրենքի շրջանակներում, որի պահանջը տիրույթի 1/3-ն էր: Սկսվել է հեռարձակում եւ դրանից հետո ԱԺ-ն օրենքի փոփոխությամբ սահմանել է 1/5-ը: Կապուղիների տրամադրման, հատկացման պահին բարեխիղճ է եղել հանձնաժողովը՝ այդ պահին պահպանվում էր գործող օրենքի պահանջը: Իսկ հետո մտցվեց խստացնող պահանջ, որը չունի հետադարձ ուժ»: Որքան տեղյակ ենք՝ այս նորմը գործում է միայն քրեական օրենսդրության պարագայում՝ ոչ հեռարձակողների: Սակայն անկախ պատճառաբանությունների հիմնավորվածությունից՝ իրողությունը չի փոխվում. գործող օրենքն այս պահին խախտված է՝ OPT եւ PTP-ի ամբողջական վերահեռարձակմամբ: Ա. Ի.
