ՓՈՐՁԱՌՈ՞Ւ, ԹԵ՞ ԵՐԻՏԱՍԱՐԴ ՌԵԿՏՈՐ Տնտեսագիտականի ուսանողները նախընտրում են փորձառուին Այսօր կկայանան Երեւանի տնտեսագիտական ինստիտուտի ռեկտորի ընտրությունները: Երեկ մենք հարցում անցկացրինք բուհի ուսանողների շրջանում՝ պարզելու, թե ռեկտորի թեկնածուներից որ մեկն ունի ընտրվելու առավել մեծ շանսեր: Նախօրոք առաջադրված 6 թեկնածուներից պայքարը կշարունակեն միայն 2-ը՝ Կառավարման ամբիոնի վարիչ Յուրի Սուվարյանը եւ Տնտեսագիտության տեսության ամբիոնի դոցենտ Հովսեփ Աղաջանյանը: Ըստ համալսարանի ուսանողական խորհրդի անդամ Ռուզան Ղուլյանի կանխատեսման, ընտրությունները կանցնեն արդար ու թափանցիկ. «32 հոգին շատ փոքր թիվ է, որ կարողանան անարդար ինչ-որ բան անել»: Ընտրությանը մասնակցող բուհական խորհրդի անդամ 8 ուսանողները նշեցին, թե կցանկանային, որ նորընտիր ռեկտորը օժտված լինի կառավարման ձիրքով եւ անպայման «ներսի» մարդ լինի: «Լավ կլիներ, որ նորանշանակ ռեկտորը Գրիգոր Կիրակոսյանից ժառանգեր նրա՝ ուսանողի հետ անմիջական շփման ունակությունը»,- նշեց Ռ. Ղուլյանը: Ուսանողական խորհրդի նախագահի օգնական Սարգիս Ասատրյանցը ավելացրեց. «Կցանկանայի, որ նոր ռեկտորը իր հետ նոր մասնագիտություններ բերեր մեր բուհ: Այսօր մեր հանրապետությունում մեծ կարիք կա տնտեսագետ-լրագրողների, տնտեսագետ-իրավաբանների, տնտեսագետ-թարգմանիչների: Շատ հաճախ մարդիկ ստիպված են լինում սովորել նախ տնտեսագետի մասնագիտությունը, հետո իրավաբանինը: Կցանկանամ նաեւ, որ նոր ռեկտորը կատարելագործի պրակտիկան մեր բուհում: Ես այսօր պրակտիկա եմ անցնում այստեղ, սակայն այն «լավ» որակել չեմ կարող»: ԵՏՀ-ի ուսանողական խորհրդի նախագահ Արմեն Ալեքսանյանը, կարեւորելով բուհական կրթության միջազգային ինտեգրման հարցը, նշեց. «Ցավոք, այս հարցում մենք մի քիչ թույլ ենք, այս առումով նույնպես նորընտիր ռեկտորի հետ մեծ հույսեր ենք կապում»: Ս. Ասատրյանցը նշեց, որ նախկին ռեկտորն էլ բավարարում էր իրենց պահանջները. «Սակայն բուհի զարգացումը շատ դանդաղ էր ընթանում: Ռեկտորի 2 թեկնածուների անցած ճանապարհը ուսումնասիրելով՝ համոզված եմ, որ մեր կրթության զարգացման քայլերը անպայման թռիչքային կլինեն եւ կունենանք 21-րդ դարին հարիր բուհ»: Ա. Ալեքսանյանը, որպես թեկնածուների դրական հատկանիշ, մեջբերեց նրանց անկուսակցական լինելը. «Բուհը, կրթական օջախը չպետք է քաղաքականացված լինի: Ես ինքս կուսակցական եմ (Արմեն Ալեքսանյանը ՀՀԿ անդամ է.- Լ.Օ.), սակայն կուսակցական գաղափարները բուհ չեմ բերում»: Նկարագրելով թեկնածուներին, Ա. Ալեքսանյանը նշեց, որ նրանք երկուսն էլ դոկտոր են՝ Հ. Աղաջանյանը երիտասարդ է, Յու. Սուվարյանը՝ ավելի փորձառու: Վերջինս արդեն հասցրել է որպես պրոռեկտոր աշխատել այս բուհում, իսկ մյուսն ազնիվ մարդ է, սակայն դեռ չի հասցրել փորձ ձեռք բերել: Ուսխորհրդի ընտրելու իրավունք ունեցող 8 անդամները կընտրեն փորձառու դասախոսին: Ըստ նրանց, ռեկտորի պաշտոնի 2 հավակնորդներն էլ իրենց ծրագրերում ընդգրկել են ուսանողներին մտահոգող խնդիրները: ԼՈՒՍԻՆԵ ՕՀԱՆՅԱՆ Հ. Գ. Փաստորեն, սպասվածին հակառակ, այս բուհի ընտրություններում պայքարի թեժությունը մարել է: Պատճառն այն է, որ Յու. Սուվարյանի գլխավոր հակառակորդ, պրոռեկտոր Միհրդատ Հարությունյանը, մյուս 3 թեկնածուների հետ, ետ է վերցրել ռեկտորի թեկնածության իր հայտը: ԿԳ նախարարության կադրերի բաժնի պետ Ռուզաննա Գրիգորյանից տեղեկացանք, որ ռեկտորի թեկնածության հայտ ներկայացրած 4 անձինք նախարարությունից չեն կարողացել հետ վերցնել իրենց հայտերը, քանի որ ժամկետներն արդեն լրացել էին, եւ գործերն ուղարկվել էին բուհ՝ խորհրդի նախագահին: Ռ. Գրիգորյանը նաեւ ասաց, որ հայտերը նրանք կարող էին հետ վերցնել արդեն միայն խորհրդի նախագահին դիմելով: Երեկ բուհից որեւէ մեկի հետ կապվելու մեր ջանքերն ապարդյուն անցան: Սակայն մեր տեղեկություններով, Մ. Հարությունյանն իր հայտը հետ է վերցրել՝ քաղաքական շահարկումներից խուսափելու համար, քանի որ նա ՍԴ նախագահ Գագիկ Հարությունյանի հորեղբոր որդին է: Այս մասին մանրամասներ՝ վաղվա համարում: