Այգեստան
10 փողոցի 18 տան սեփականատեր, ԵՊՀ պրոֆեսոր, պատմական գիտությունների դոկտոր Բաբկեն
Հարությունյանը կարծում է, որ «դաժանորեն խախտված են» ինչպես իր, այնպես էլ համասեփականատեր
քրոջ՝ Քնարիկ եւ եղբոր՝ Միհրան Հարությունյանների իրավունքները: 18ա տան ընդլայնման
արդյունքում փակվել է իրենց՝ 18 տան արեւի լույսը: «Հյուսիսային կողմից պատ կառուցելով,
3,5 մ բարձրության սյուներին արդեն մասամբ դրված ծածկը լույսից բոլորովին զրկում
է մեր տան հյուսիսային սենյակներից աջակողմյանը, իսկ մյուսներն էլ ըստ էության բավարար
արեւային լուսավորություն չեն ստանում»,- «Առավոտին» բողոքեց Բ. Հարությունյանը:
Քաղաքապետարանը թույլատրել է 18ա-ի բնակչին՝ Կարինե Հարությունյանին, 6,4մ
երկարությամբ պատի կառուցում, ինչը, ըստ անվանի գիտնականի, «16 հարկանի երկու երկնաքերներով
հարակից շրջափակված ձախակողմյան սենյակը նորմային չբավարարող լուսավորությունից է
զրկում»: Նախագծման ժամանակ որեւէ մեկը հարկ չի համարել հանդիպել 18 տան տերերի հետ՝
ստանալու նրանց համաձայնությունը: Վիճահարույց շենքի նախագիծը կազմել է ճարտարապետության
եւ շինարարության համալսարանի ճարտարապետության ֆակուլտետի գործող դեկանը, հաստատել
է քաղաքապետարանի քաղաքաշինության վարչության պետը (նախկին դեկանը), իսկ շինարարությունն
իրականացնում է նշված ֆակուլտետի դեկան Տիգրան Բարսեղյանի եղբայրը: Ուշադրության
արժանի է այն, որ արեւահարության ռեժիմի հաշվարկը կատարվել է նույն ֆակուլտետի պրոֆեսոր,
դոկտոր Յուրի Հովսեփյանի կողմից: Սակայն, որքան էլ ճանաչված մտավորականը պնդում է,
որ խոցելի է տեխնիկական նախագիծը եւ իրենց տան ինսոլացիոն ռեժիմի մասին եզրակացությունը,
քաղաքապետարանը հակառակն է փորձում ապացուցել, մասնավորապես՝ տարբեր ժամանակներում
նույն տեքստը Բ. Հարությունյանին է ուղարկել Երեւանի քաղաքապետարանի աշխատակազմի
ճարտարապետության վարչության պետի տեղակալը, ասելով, որ ոչ մի նորմ խախտված չէ: Ճարահատյալ
ԵՊՀ հայոց պատմության ամբիոնի վարիչը հղում է արել «Տեղեկատվության մասին» գործող
օրենքին, խնդրելով այդ օրենքի պահանջներից մեկը կատարել. տրամադրել Այգեստան 10-րդ
փողոցի 18 տան ինսոլացիոն ռեժիմի հաշվարկի պահանջը: Երեւանի ճարտարապետության եւ
շինարարության պետական համալսարանի ռեկտոր Հ. Թոքմաջյանը հունիսի 16-ին «այդուհանդերձ,
հարգելով մանկավարժ-գիտնականի վաստակը», Բ. Հարությունյանին ուղարկեց պահանջած տեղեկատվությունը,
նաեւ գիտահետազոտական սեկտորի եւ ճարտարապետության ֆակուլտետի ներկայացուցիչների
համատեղ նիստի (հունիսի 12) արձանագրությունը: ՌՈՒԶԱՆ ՄԻՆԱՍՅԱՆ
