Երեկ ԼՂՀ նախկին ԳԽ եւ գործող ԱԺ մի քանի պատգամավորներ ու արցախյան ազատամարտին մասնակցած նախկին հրամանատարներ բաց նամակով դիմել են ՀՀ բարձրագույն ղեկավարությանը՝ խնդրելով փոխել Ժիրայր Սեֆիլյանի եւ Վարդան Մալխասյանի նկատմամբ խափանման միջոցն ու նրանց ազատ արձակել՝ նկատի ունենալով վերջիններիս՝ արցախյան ազատամարտում «անուրանալի ծառայությունները», նաեւ՝ «խորապես համոզված լինելով, որ ՀՀ իշխանությունների ձեռնարկած միջոցները համադրելի չեն հասարակական-քաղաքական դաշտում Ժ. Սեֆիլյանի եւ Վ. Մալխասյանի ծավալած գործունեությանը»:
Նամակի հեղինակների կարծիքով՝ «Ազատամարտի հերոսների նկատմամբ նման վերաբերմունքը կարող է սասանել հայրենիքի պաշտպանության սուրբ պարտականության նկատմամբ մարդկանց հավատը»:
Երեկ ի պաշտպանություն Ժ. Սեֆիլյանի եւ Վ. Մալխասյանի՝ հայտարարություն են տարածել «Քաղաքացիական նախաձեռնությունների ազատ ամբիոն» հ/կ-ն՝ ի դեմս Գայանե Մարկոսյանի, «Հայաստանի հելսինկյան կոմիտեն»՝ Ավետիք Իշխանյանի գլխավորությամբ, եւ Վարդան Հարությունյանի ղեկավարած «Իրավունքի եւ ազատության կենտրոնը»: Հայտարարության մեջ մասնավորապես ասված է, որ Ժ. Սեֆիլյանին ու Վ. Մալխասյանին առաջադրված մեղադրանքն ու ՔՕ համապատասխան հոդվածը՝ «սահմանադրական կարգը բռնությամբ փոփոխելուն ուղղված հրապարակային կոչ», «իր բովանդակությամբ զուտ քաղաքական է, եւ իրապես ժողովրդավար երկրներում, ուր ժողովուրդն է իշխանություն ձեւավորողը եւ ապահովված է խոսքի ազատությունը, դժվար է պատկերացնել նման հոդվածի կիրառումը: Սույն հոդվածը բռնապետական բնույթ ունեցող երկրներում դամոկլյան սրի պես կախված է յուրաքանչյուր այլախոհի գլխին եւ այն կամայականորեն կարող է կիրառվել ցանկացած քաղաքացու նկատմամբ»: Հայտարարության հեղինակները, դատապարտելով «ՀՀ-ում խոսքի ազատության եւ քաղաքական գործունեության սահմանափակման ցանկացած դրսեւորում», կոչ են արել «հասարակական եւ քաղաքական կազմակերպություններին, հասարակությանը իրենց բողոքի ձայնը բարձրացնել երկրում շարունակվող քաղաքական հետապնդումների դեմ»:
