![\"\"](\"https://www.aravot.am/2007/aravot_arm/December/15/p8.jpg\")
Մեծբրիտանացի Ուեյն Էքլոքին 5-րդ ռաունդում նոկաուտի ենթարկելուց հետո IBF-ի վարկածով միջին քաշային կարգում աշխարհի չեմպիոն Արթուր Աբրահամը ամերիկացի մի լրագրողի պատմել է այդ մենամարտի եւ իր ապագա ծրագրերի մասին, որը ներկայացնում ենք որոշ կրճատումներով:
Նրա խոսքերով, Էքլոքը անհարմար մրցակից էր: Նա ֆիզիկապես ուժեղ է եւ տիրապետում է աջից հուժկու կողային հարվածների: Դրանցից մեկը երկրորդ ռաունդում տեղ հասավ: Սակայն Էքլոքը մարտի ընթացքում 3-4 անգամ գլխով հարվածեց դեմքիս, որից հետո աչքս սկսեց այտուցվել: Եվ որպեսզի հետագայում տեսողության հետ բարդություններ չառաջանային, մարտի տեմպն արագացրի ու հինգերորդ ռաունդում նրան նոկաուտի ենթարկեցի:
Խոսելով Կելլի Պավլիկ-Ջերմեն Թեյլոր երկրորդ մենամարտի հավանական ելքի մասին՝ Աբրահամն ասել է. «Կարծում եմ, կրկին կհաղթի Պավլիկը: Նա շատ գրագետ է մարտը վարում»: Այնուհետեւ լրագրողը հարցրել է.
– Ուզո՞ւմ ես հանդիպել նրանց հաղթողի հետ:
– Ցանկանում եմ սուպերչեմպիոն դառնալ եւ նպատակիս հասնել Ամերիկայում՝ «Մեդիսոն Սքուեր Գարդենում»: Կարծում եմ՝ դա կլինի արդեն եկող տարի: Բացառված չէ, որ լավ առաջարկ լինելու դեպքում ավելի շուտ գանք ԱՄՆ: Դա հայտնի կլինի միայն Պավլիկի մարտից հետո:
– Ֆելիքս Շտուրմի հետ բանակցություններ վարվո՞ւմ են:
– Իմ մենեջերը նրան արդեն մեկ միլիոն առաջարկել է, իսկ հիմա ավելի շատ ենք առաջարկում: Ինձ համար դա նույնպես հետաքրքիր մենամարտ է:
– Շտուրմին ճանաչո՞ւմ ես: Ի՞նչ տարբերություն կա ճանաչած եւ անծանոթ մրցակիցների միջեւ:
– Միմյանց բարեւում ենք, հարաբերությունները նորմալ են: Իսկ ռինգում ծանոթ-անծանոթ լինելը նշանակություն չունի: Եթե մարդը ցանկանում է քեզ հետ «կռվել», նա օտար մարդ է: Մարտից հետո կարելի է բոլորին էլ հարգել:
– Առաջիկայում ի՞նչ ծրագրեր ունես:
– Հույս ունեմ գնալ հայրենիք՝ Հայաստան: Վերջին չորս տարում առաջին անգամ ցանկանում ենք ամբողջ ընտանիքով Ամանորը դիմավորել Երեւանում:
