«Ծեր» տաքսիներին արգելում են փողոց դուրս գալ

Երեկվանից Ճանապարհային ոստիկանության եւ տրանսպորտի եւ կապի նախարարության տրանսպորտային տեսչության աշխատակիցները մայրաքաղաքի փողոցներում ուշադիր հսկում են, որ հայտնաբերեն բոլոր այն տաքսիները, որոնք աշխատում են առանց դեղին պետհամարանիշների, այսինքն՝ առանց լիցենզավորման:

Ոստիկաններն ու տեսչության աշխատակիցները պետք է «աչքները չորս արած» զննեն երթեւեկող բոլոր տաքսիներին, եւ եթե նրանցից որեւէ մեկը հնամաշ տեսք ունենա՝ անմիջապես կանգնեցնեն ու ստուգեն տվյալ մեքենայի փաստաթղթերը՝ պարզելու, թե մեքենան քանի տարվա հնություն ունի: Եթե պարզվի, որ որպես տաքսի ծառայող ավտոմեքենայի տարիքը 10 տարուց ավելի է, ապա բացի այն, որ նրա գործունեությունը դադարեցվելու է, վարորդին պարտադրվելու է, որ նա ներկայանա նախարարություն եւ հաշվառվի: Այս մասին «Առավոտի» հետ զրույցում տեղեկացրին տրանսպորտի եւ կապի նախարարությունից: 10 տարեկանից «մեծ» բոլոր տաքսիներին հաշվառելուց հետո, ոլորտի պատասխանատուները պետք է փորձեն նրանց համար ժամանակավոր լուծում գտնել:

Հիշեցնենք, որ անհատ տաքսիների վարորդների բողոքներից ու ցույցերից հետո, սկսեցին բողոքել նրանք, ովքեր ենթարկվելով տրանսպորտի եւ կապի նախարարության պահանջներին, նոր մեքենաներ են ձեռք բերել, պետական տուրք վճարել, սակաչափիչներ եւ դեղին պետհամարանիշներ տեղադրել: Ըստ նրանց, իրենք աշխատում են անհավասար պայմաններում, ինչը կարող է հանգեցնել նրան, որ, ի տարբերություն իրենց, չլիցենզավորված տաքսիները կարողանան անհամեմատ էժան ծառայություն մատուցել:

Երեկ, մայրաքաղաքում սկսված ստուգայցերի դեմ բողոքով, անհատ տաքսու վարորդները դարձյալ ցույց էին կազմակերպել: Նրանք բողոքում էին, որ տրանսպորտի նախարարության ներկայացուցիչները անցած շաբաթ իրենց հավաստիացրել են, որ մինչեւ 2010 թվականը իրենք կաշխատեն այնպես, ինչպես աշխատել են՝ չեն տուգանվի եւ չեն ակտավորվի: Մինչդեռ, երեկ ոստիկանները արդեն իսկ տուգանել եւ ձեռքներից վերցրել են տասնյակ վարորդների փաստաթղթերը:

Նախարարության տեղեկացմամբ, այսօր օրինական դաշտում աշխատում է մոտ 6500 տաքսի, եւս 6500-ը գործում է անօրինական պայմաններում, այսինքն՝ առանց դեղին պետհամարանիշների: Ինչ վերաբերում է այն տաքսիներին, որոնց տարիքը 10-ից ավելի է եւ որոնց իրավունք չի տրվում աշխատել որպես տաքսի, ապա նման մեքենաների թիվը, ըստ նախարարության, հասնում է մոտ հազարի: