Օրերս Հայաստանի երաժշտական ընկերության «Արեւ արտ» ցուցասրահում բացվեց «Ազատություն» խորագրով քանդակագործության ցուցահանդես, որտեղ ներկայացված են հայ քանդակագործներ Գեւորգ Մշեցու, Գարեգին Դավթյանի, Լեւոն Թոքմաջյանի, Աշոտ Բաղդասարյանի եւ այլոց վերջին տարիների աշխատանքները: Ցուցահանդեսի ընթացքում «Արվեստ. 21-րդ դար» հիմնադրամի նախաձեռնությամբ կայացավ մրցույթ, որի ընթացքում ներկայացված քանդակագործները գնահատեցին մեկը մյուսի աշխատանքները, որոշելով տվյալ օրվա լավագույն երեք ցուցանմուշները: «Արվեստ. 21-րդ դար» հիմնադրամի տնօրեն Հարություն Մարգարյանի խոսքով, ցուցահանդես-մրցույթի նպատակն է փոքր-ինչ խրախուսել քանդակագործներին: Ցուցահանդես-մրցույթի մասնակից Աշոտ Բաղդասարյանը «Առավոտի» հետ զրույցում նշեց, որ մրցույթի մասին ոչինչ չի իմացել. «Ինձ ասել են կա ցուցահանդես, ես էլ ներկայացրի աշխատանքս: Այստեղ տեղեկացա, որ ինչ-որ մրցանակներ պետք է շնորհվեն, լավագույններ ընտրվեն: Մրցույթի երեւույթը գովելի է, քանի որ ամեն նմանատիպ նախաձեռնություն մի նոր քայլ է առաջ՝ մեր մշակութային կյանքում»: Ա. Բաղդասարյանի խոսքով, քանդակագործության նկատմամբ վերջին ժամանակներս անուշադրություն է նկատվում. «Լավ կլիներ, որ այցելուները շատ լինեին ու ցուցահանդեսները զուտ ստեղծագործողների շրջանակներում չանցկացվեին: Քանդակագործությունը բարձիթողի վիճակում է…»: Քանդակագործ Լեւոն Թոքմաջյանը վստահեցնում է, որ ամեն մի նմանատիպ փոքրիկ միջոցառում ստեղծագործողների անշարժ կյանքը շարժման մեջ է դնում: Ցուցահանդես-մրցույթի հաղթողներ դարձան Գեւորգ Մշեցին՝ «Սանդերք խաղաղության», Գարեգին Դավթյանը՝ «Ակտ-արդարության», Էմին Պետրոսյանը՝ «Թռիչք» քանդակներով:
